Neguriko Gobela ikastolako hainbat eskola-umek 120 arbola berri baino gehiago landatu dituzte duela gutxi Gobela ibaiko ezkerreko ibaiertzean, Algortako Etxezuri-Larrañazubi aldean. Lehen Hezkuntzako 5. eta 6. mailako ikasleek jarri dituzten arbola espeziak, lizar, haltz eta zumeak izan dira; eta "ibaiertzak sendotzeko" ipini dituzte, Getxoko Udalak zabaldu duenez. Ekimena URA Uraren Euskal Agentziak antolatu du, tokiko erakunde getxoztarrak lagunduta. Eta Gobela ikastolakoek "beren borondatez" parte hartu dute bertan. Landaketa egin aurretik, lagundu duten 42 neska-mutilek ibai batean ur-bazterreko landarediak duen eginkizun garrantzitsuari buruzko informazioa jaso zuten: ibaiertzak egonkortzea bermatzen du, uraren higadura-efektua gutxituz; uraren tenperatura eta iristen zaion argia moteltzen ditu; eta animalia espezie askori babesa eta hazkuntza eta atseden-tokia eskaintzen dizkie, nagusiki. Argazkian, Gobela ikastolako eskola-umeak zuhaitz landaketan / © Getxoko Udala.
Ikasleak 7 taldetan banatu zituzten, bakoitza lorazain baten kargura, landaketa egin ahal izateko. Horren ostean, egindako lanaz txostena bete zuten. "Gobela ikastolako irakasle zein ikasle beraien balorazioa guztiz baikorra izan da. Izan ere, egunero ikusten duten errekaren gaineko informazio berria jaso baitute eta ekintza ezberdina egin baitute", azaldu dute udal iturriak. Horrez gainera, ikasleei txaleko islatzaile bana oparitu zieten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun