Eusko Jaurlaritzaren Segurtasun Sailak alerta laranja ezarri du ostiral honetarako, toki babesgabeetan haize bolada gogorrak izan daitezkeelako. 120 kilometro ordutik gorako haize ufadak izan daitezke, batez ere mendi eremuetan. Gaur eguerdira arte abisu horia aktibatuta egon da babesik gabeko guneetan. Haizearen eragina Matxitxakon (117,8 km/h) eta Urduñan (111,5 km/h) nabaritu da gehien, Eitb.com agerkariak azaldu duenez. Bestalde, Zaldiaranen 105,8 kilometro orduko haize ufadak izan dira; Ordizian, 87,5ekoak; eta Espejon, 85ekoak.
Ostiral honetan, babesik gabeko guneetan alerta laranja 18:00ak arte egongo da indarrean. Babestutako eremuetan, berriz, abisu horia ezarri dute, 100 kilometro orduko haize boladak espero direlako. Larunbatean, arreta meteorologikoa itsasoan zentratuko da. Abisu horia aktibatuko dute ipar-mendebaldean, hondoko itsasoaren ondorioz 3,5 metroko olatuak altxatuko direlakoan.
Eusko Jaurlaritzaren Segurtasun Sailak haizeagatik bihar, ostiralean, otsailak 14, indarrean jarriko duen alerta laranja dela eta, 08:00etatik 18:00etara Algortako Fadura eta Itzubaltzeta / Romoko Gobela kiroldegietako kanpoko kirol jarduera guztiak bertan behera geratuko dira: Bolueko futbol zelaiak, atletismo pista, errugbi zelaia, belodromoa, estali gabeko tenis eta padel pistak, estalitako tenis pistak eta estali gabeko kirol anitzeko kantxak, itxita egingo dira. Getxoko Udalak gaineratu duenez, kirol ikastaroak normaltasunez emango dira aipatutako ordura arte, Gobelako tenis eta padel eskolak eta Fadurako tenisekoak izan ezik. Larrialdiren bat izatekotan, honako telefono zenbaki hauetara deitu behar da: 944 660 202 (Getxoko Udaltzaingoa) eta 112 (SOS Deiak). Argazkian, astelehenean Algortako Bolue 1 eta 2 futbol zelaiak itxi zituen Getxoko Udalak, haizeak Fadurako Hobekuntza Teknikorako Zentroko teilatuaren zati bat hondatu zuelako / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun