Udal Gobernuko kideek ere gogoratu zuten "gaur egun Sopelako kaleak ez daudela prest eskualde osoko trafikoa jasotzeko". Gaineratu zutenez, "Olabide kale amaieran eraiki gura duten errepidea, eraikitzekotan, ez du Sopelako Udalak ordainduko, eskualde-sistema izan behar duelako".
Arazo honi "konponbide integrala" bilatzeko asmoz, Sopelako Udalak gonbitea luzatu die proiektuan inplikatuta dauden gainontzeko erakundeei bilera bat antolatzeko. Aipatu bilera egitea udalbatzak onartu zuen, Bildu eta PSE-EEren aldeko botoekin, eta EAJ eta PPren kontrako botoekin.
Auzokideak ere, oso kezkatuta
Kaltetuak izan daitezkeen auzoetako bizilagunak ere oso kezkatuta agertu ziren ospitalearen sarbideekin. Udalak zabaldu duenez, auzokideen ekarpen batzuk ondokoak izan ziren:
- Kezka agertu zen Gatzarriñe kalean eraikiko den bidegorriarekin, trafikoa nabarmen handitzen bada arriskutsua izan daitekeelako umeentzat bidegorria erabiltzea.
- Argi eta garbi azpimarratu zen ospitalea eraiki den gunea ez dela egokiena, ez duelako inolako sarbiderik eta eraikita izan den gunea babestu behar zelako.
- Egoera nahiko konplexua dela agertarazi zuten, ospitalea jada eraikita dagoelako eta ez dutelako konponbide bideragarririk ikusten.
- Ingurumena errespetatuko duen eta auzokideen bizi-kalitatea bermatuko duen konponbidea bilatu behar dela adierazi zuten.
- Hainbat auzokidek gogoratu zuten gaur egun Gatzarriñe eta Enrike Urrutikoetxea kaleetan trafiko-arazoak daudela, eta trafikoa handituko balitz orduan egoera askoz zailagoa izango litzatekeela.
- Olabide kalean hainbat semaforo jarri behar direla nabarmendu zuten, abiadura gutxitzeko, eta inondik inora ezin direla badenak kendu.
- Azpimarratu zuten proposatutako bidea (Olabide kalea) ez dela egokia eta beste bide bat topatu behar dela.
- Hainbat auzokidek adierazi zuten ospitalearen trafikoa hortik bideratzekotan bertako auzokideen bizi-kalitatea jaitsiko dela (kutsadura, zarata, arriskua, eta abar) baina biderik errazena hautatu dutela.
- Auzokide batek proposatu zuen “Sopelako saihesbidea” eraiki behar dela, hots, pasarelaren errotondatik errepide bat eraiki behar dela Ripa kaleraino, Manene zeharkatuz.
- Auzokideek txalotu zuten Udalak beste erakundeak bilera batera deitzea konponbide bat denon artean bilatzeko.
- Oinezkoei lehentasuna eman behar zaiela nabarmendu zuten.
- Udalak bilera antolatu izana eskertu zuten, informazioa jaso zutelako eta euren iritzia emateko aukera eman zutelako.
Urdulizko ospitalearen sarbide eta trafikoagatik kezkatuta daude sopeloztarrak
Sopelako Udalak auzo-bilera egin zuen joan den asteazkenean Urdulizko Marutze auzoan eraikitzen ari diren Alfredo Espinosa ospitalearen sarbideen inguruan informazioa emateko eta auzokideen iritzi eta ekarpenak jasotzeko. Batzarrera 70 auzokide baino gehiago gerturatu ziren, gehienak Gatzarriñe, Enrike Urrutikoetxea eta Olabide kaleetakoak, eta argi geratu zen erietxeak sor dezakeen trafikoak kezka handia sortzen duela, tokiko iturriek adierazi dutenez. Lehenik eta behin, Saioa Villanueva Sopelako EHBilduren alkateak eta Alain Goldaraz alkate-ordeak egoeraren nondik norakoak azaldu zituzten. Azaldu zutenez, gaur eguneko sarbideekin hiru modu daude ospitalera heltzeko: Olabide kaletik, Gatzarriñe kaletik aurrera jarraituz Garden Center igaroz Urdulizerano, eta Sopelako herrigunea zeharkatuz. Udal Gobernuak azaldu zuen, "printzipioz, Osakidetzak eta Urdulizeko Udalak Olabideko aukera onetsi" dutela. Horrek, honako ondorioak izango lituzke Sopelarentzat: "trafikoa nabarmen igoko litzateke Larrabasterra erdialdean, Gatzarriñe kalean, Gatzarriñe eta Olabide arteko bidegurutzean, Olabide kalean, eta abar". Gainera, aipatu kale horrek abiadura gutxitzeko hamaika baden ditu, eta ospitaleko erabiltzaileek hainbat “oztopo” izango lituzkete bidean: semaforoak, bidegorri bat, zebrabide goratuak... Sopelako Udal Gobernuak gogoratu zuen ez dutela informazio askorik jaso proiektu honetaz, Sopelan eragin zuzena izango duen arren. Gainera, azpimarratu zuten ez dutela gai honen kudeaketa konpartitzen. Hasteko, ospitalea eraiki duten lekua ez delako egokia: inolako sarbiderik ez duelako eta eraiki duten gunearen ingurumen-garrantziagatik. Argazkian, joan den asteazkeneko batzar irekia Kurtzio kultur etxean / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun