Bildu koalizioaren Getxo udalerriko taldeak hainbat sare sozialetan zabalik dituen profilak itxi egin berri ditu, Interneteko presentzia oro EHBildu koalizio zabalagoaren izenpean izateko. Hortaz, Facebook eta Twitter sare sozialetan BilduGetxo izena baztertu eta Getxoko EHBilduren soslaia erabiliko du Sortu, Eusko Alkartasuna, Aralar, Alternatiba eta hainbat independente batzen dituen koalizioak. Gauzak horrela, Facebook zein Twitterren @GetxokoEHBildu profilean topatu ahal izango dira albiste, proposamen eta hitzordu berriak. Orain arte bezala, Getxoko Udalbatzaren berri zuzenean emango dutela berretsi dute EHBilduko kideek, horretarako ohi bezala #getxoudalbatza traola erabiliko dutela. Argazkian, Getxoko BIlduren zinegotziak eta zaleak 2011ko ekainaren 11n.
Bildu koalizio ezkertiar eta abertzalea 2011ko apirilaren 3an aurkeztu zen, Eusko Alkartasunak, Alternatibak eta independente talde batek sortua. Independente horietako asko orduan legez kanpo zegoen ezker abertzaletik gertukoak ziren. Lurralde batzuetan beste talde txiki batzuk ere sartu ziren, hala nola, Araba Bai alderdia, eta Herritarron Garaia plataforma. Hasieran zerrendak legez kanpo utzi bazituzten ere, Espainiako Auzitegi Konstituzionalak 2011ko maiatzaren 4an legalizatu zituen, udal eta foru hauteskundeen atarian. 313.231 boto eta 1.138 zinegotzi eskuratu zituzten. Urte bereko irailaren 27an, Bilduko kideek eta Aralarrek Amaiur izeneko taldea aurkeztu zuten, Espainiako Hauteskundeei begira. Hurrengo urtean, Amaiurreko bazkideek Euskal Herria Bildu edo EHBIldu izenarekin parte hartu zuten EAEko hauteskundeetan, Sortu ezker abertzaleko alderdia ja legala zela. Datorren urtean, udal eta foru bozketetan EHBildu aurkeztuko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun