Hondakinei Aurrea Hartzeko Astea deritzon ekimenaren barruan, Europa mailako sariketa egingo dute maiatzean Erroman. Hain zuzen ere, Ekogune Uribe Kostako Mankomunitatearen Iraunkortasun Sailaren “buKata Rolla” aukeratu dute, beste hirurekin batera, Euskal Autonomia Erkidegoa (EAE) ordezkatzeko. Otartekoak, sandwichak, gailetak, fruta… eramateko bilgarri ekologiko eta berrerabilgarriarekin batera, sarirako hautagai ere izendatu dituzte ondokoak: Mungiako Bigarren Hezkuntzako Institutua, Goierri deritzon Osasun Erakunde Integratua (OSI) eta SEUR. Joan den asteazkenean, otsailak 12, banatu zituzten Eusko Jaurlaritzaren Bilboko egoitzaren areto nagusian aipatu hautagaitzak egiaztatzen zituzten diplomak, Mankomunitateak berak zabaldu duenez. Anabel Landa aipatu tokiko erakundearen presidenteak hartu zuen frogagiria, Ekoguneren izenean. Argazkian, Anabel Landa hitza hartzen joan den asteazkeneko ekitaldian / © Uribe Kostako Mankomunitatea.
Hondakinei Aurrea Hartzeko Europear Astea azaroaren 16tik 24ra bitartean egin zen Uribe Kostako mankomunitatean. Ekimen horren barruan, hainbat bUKata Roll banatu ziren eskualdeko ikastetxe batzuetan. Parte hartutakoei hitzaldi laburra eskaini zitzaien, eta ikasle bakoitzari bUKata Rolla eman zitzaion. "2011n, bUKata Roll-ek 200 tona aluminio paper saihesten lagundu zuen; bestela esanda, 30.000 kilometro paper baino gehiago, hau da, Australiara joan eta etorriko bidaia bat", azaldu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun