Sopelako Udalak hitzarmena sinatu du Euskal Herriko Unibertsitatearekin (EHU), aipatu udalerrian herritarren parte-hartzearen inguruko diagnositkoa eta ikerketa egiteko. "Orain arte, Sopelako Udalak hainbat bide zabaldu ditu herritarren parte hartzea ahalbidetzeko. Ikerketa honekin, gaur egun dauden bideak bultzatzea eta bide berriak zabaltzea da asmoa, herritarren parte-hartzea erraztuz eta batez ere, herrian parte-hartze kultura handituz", azaldu dute tokiko arduradunek. Horretarako, Udalak “Partaidetza eta Komunitate-Garapena” masterreko ikerketa talde bat izango du. Talde horretako kideak aipatu masterraren ikasleak dira, eta beraz, ikerketa euren ikasketa-prozesurako baliogarria izango da. Masterraren koordinazioa Parte Hartuz taldeak egiten du. Horrek demokrazia parte-hartzailea lantzeko hainbat proiektu garatu ditu, eta esperientzia eta formakuntza ezberdineko pertsonek osatzen dute: ikertzaileak, irakasleak, bekadunak, kolaboratzaile adituak, eta abar. Zientzia Politiko, Soziologia eta Hezkuntza Sailetako kideek parte hartzen dute tade horretan, eta hamar urtetan demokrazia parte-hartzailea sustatzeko hamaika prozesu bultzatu dituzte. Argazkian, udaletxean egindako herri bilkura bat, artxiboko irudian / © Sopelako Udala.
Herritarren parte-hartzea bultzatzea "ezinbestekoa" da Sopelako Udalarentzat, erakunde eta administrazioen funtzionamendua hobetzeko. Tokiko arduradunen arabera, "gaur egun bizi dugun testuinguru ekonomiko, sozial eta politikoak eta zatiketa sozialak, kudeatzeko beste modu bat eskatzen dute. Erabakitzeko prozesu publikoetan herritar guztiak inplikatzea beharrezkoa bihurtu da". Gaineratu dutenez, "politikagintza (kasu honetan udal politikagintza) hobetu egiten da eragiten dion jendearen esperientziak, ideiak eta ezagutzak kontuan hartzen badira. Horrela, sopeloztarren eskaera eta beharrei modu eraginkorrean erantzuteko aukera izango dugu". Udalak, sopeloztarren bizi-kalitatea hobetzea helburu, apurka-apurka parte-hartze eredu hori indartu gura du tokiko erakundeko sail eta erabakigune guztietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun