Ertzaintzak Erandio eta Leioako 18 eta 25 urte arteko lau gizonezko atxilotu zituen atzo arratsaldean, 19 urteko beste mutil bat legez kanpo atxikitu eta horri mehatxuz lapurtu zein kalteak eragitea egotzita. Eusko Jaurlaritzaren Segurtasun Sailaren arabera, igandean 21:00 inguruan hasi ziren gertaerak Leioan. Polizia iturriek diotenez, bi "ezagun" hurbildu zitzaizkion aipatu gazteari bere etxeko ataritik gertu eta, horietako batek lepotik heldu ostean, beste bi mutilek lagunduta furgoneta batera sartzen behartu zuten; handik Erandioko Goikolanda plazara eramateko. Bertan, ibilgailutik jaistera behartu eta, behin belauniko jarrita, aurpegian ukabilkada eta ostikada eman omen zizkion erasotzaileetako batek, zorretan zituen 500 euroak bueltatzeko esaten zion bitartean. Horren ostean, MP4 erreproduzitzailea eta agiriak sartzeko plastikozko zorroa lapurtu zizkion morroi berak.
Erasotzaileek bueltan eraman zuten Leioara eta, bertan, metro geltokiraino gerturatu zen erasotutako mutila. Tokiko zaintzaileetako baten laguntzaz lortu zuen trenera igotzea, senide baten Getxoko etxera joateko, Segurtasun Sailak aipatu duenez. Ondoren, anbulantzia batek eraman zuen ospitalera, buruan eta aurpegian zituen zauriak sendatzeko. Behin gertaerak ezagututakoan, ikerketa abiatu zuen Ertzaintzak; eta tokiko iturriek diotenez, horretatik datoz atzo arratsaldeko atxiloketak: Leioako gazte bat eta Erandioko beste hiru. Lauak epailearen esku utzi dituzte gaur eguerdian, Getxoko Guardiako Epaitegian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun