Dokumentalean irratiaren ibilbideari errepasoa egitearekin batera, herrian gertatutako gertaera garrantzitsuenak aipatuko dituzte. Zintzilik irrati librea 80ko hamarkadan sortu zen, Euskal Herrian hainbat irrati libreen sorrera eta filosofia hedatzen ari zen momentuan. Herriko mugimendu sozialetako pertsonek sortu zuten irratia, komunikabide ofizialetan tokirik ez dutenei ahotsa eman eta herriari horien berri emateko. Hala nola, intsumisioa, feminismoa, ekologia, homosexualitatea, euskara…
Ekimenaren kartela
"Zintzilik irratia, herri baten historia. 27 urte ez dira ezer!" dokumentala proiektatuko dute bihar, osteguna, Algortako Eztabaida gune antiautoritarioan, Villamonte plazan. Hitzordua arratsaldeko 7:30ean jarri dute antolatzaileek eta sarrera, ohi bezala, doakoa da. Filma ikusi ostean irrati libreez eztabaida izango da. Izan ere, aldaketa garaiak bizi dira komunikazioaren munduan. Telebista LTD kanalen bidez ugaritu egin da; egunkariak urritu eta mehetzen doaz; Internet multimedia bilakatu da; eta ahizpa txikia, irratia, ez da geldi geratu. Vocento eta Coperen arteko akordioa, Euskalerria irratiaren lizentziarekin Nafarroako Gobernuak darabilen jokoa edota Info7 egonkortzeko bazkidetza kanpainarekin batera, mugimendu handi gehiago izan dira tokiko irratietan, batez ere komunitario zein libreetan. 2011n desagertu zen Koska Uribe Kostako irrati librea, Justuri irrati egitasmo komunitario euskaldunari lekua egiteko. Jaurlaritzak lizentzia agindu zion behin-behinean baina gerora lehiaketa bertan behera utzi zuen eta Uribe Kostako irratiak helegitea jarri zuen. Bilbon ere, Tas-Tas irratia desagertu zen eta 97 irratia jaio da bere ordez. Gasteizen, Hala Bedi irratiak bikoiztu du bere eskaintza, kate berri bat euskarari eskainita. Eta Trapagaranen, Gernikan, Zumaian... irrati libre berriak datoz, Interneten podcast-ak ugaldu bezala. Bitartean, Oreretako Zintzilik irratiak 27. urtemuga ospatu du. Argazkian, aspaldi desagertu zen Algortako Bost Axola irratiko esatari bat Amezti kaleko estudioan / © "UK" aldizkaria.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun