Podemos plataformak dozenaka intelektualek idatzitako "Mugi gaitezen" manifestuari erantzun zion pasa den urtarrilaren 17an. Egun horretan, Pablo Iglesias telebista aurkezlea eta politologoak Podemos aurkeztu zuen Madrilen, M-15, Izquierda Anticapitalista, marea berdea, marea zuria eta Hipoteken Aurkako Plataformako hainbat kiderekin batera. Era berean, zerrenda bat osatzeko hainbat baldintza jarri zituen: programa era parte-hartzailean idaztea; IU eta ezkerreko beste alderdiekin bokazio bateratzailea izatea; ezer egin aurretik, 50.000 sinadura biltzea, ekimen anekdotikoa ez dela izango ziurtatzeko; eta bankuetara jo barik ekimena autofinantzatzea.
Egun, 92.358 dira Podemos / Ahal Dugu babesten duten herritarrak eta ekimena tokiko taldeak sortzen hasi da. Gauzak horrela, hilaren 5ean aurkeztu zen Bilboko Hika Ateneoan Ahal Dugu Bizkaia. Antolatzaileen arabera, 110 pertsona bildu ziren eta bertan bost eskualde talde sortu zituzten, tartean Uribe Kostakoa.
Datorren maiatzaren 25ean Europako hauteskundeetan eta handik aurrera lehiatuko duen ezker hautagaitza parte-hartzailea oinarrietatik eraikitzeko asmotan, Estatu espainol mailako Podemos / Ahal Dugu ekimen politikoaren Uribe Kostako taldeak lehenengo batzarra egingo du gaur iluntzean Itzubaltzeta / Romon. Hitzordua arratsaldeko 7etan jarri dute, Lope de Vega kaleko kultur etxean. Besteak beste, dinamizatzaileen artean Ruben Belandia leioaztarra eta Mikel Labeaga itzubaltzetarra daude. Ezker Batuan urtetan jardun ostean (Belandia zinegotzia izan zen Leioan eta Labeaga Zuzendaritzako kidea), Antikapitalistak alderdia sortu zuten biek. Era berean, M-15 mugimenduan eta hamaika jendarte ekimenetan aritu dira. Argazkian, ezkerrean Ruben Belandia eta bere ondoan Mikel Labeaga Ez Irentsi baraualdi txandakatuan Areetako BBVAn / © Ez Irentsi.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun