"Behar zaituztegu oraindik" esan zuen iaz Joan Mari Torrealdaik Martin Ugalde Kultur Parkean "Euskaldunon Egunkaria"-ren itxieraren 10. urteurren egunean. Andoainen egindako ekitaldian "Egunkaria"-ren zauriari odola dariola oraindik esan zuen eta hori itxi beharra aldarrikatu. Iaztik gaurko egunera, baina, ez da aldaketarik izan. Oraindik orain, auzi ekonomikoa zabalik dago eta bertan zortzi auzipetu daude: Joan Mari Torrealdai, Iñaki Uria, Txema Auzmendi, Joxe Mari Sors, Ainhoa Albisu, Mikel Sorozabal, Begoña Zubelzu eta Fernando Furundarena. Zehaztasun gehiago topa daitezke "Berria" kazetak auziaz sortutako webgune berezian. Argazkian, 2009ko abenduaren 19an, "Egunkaria" auziko akusatuen aldeko mobilizazioa egin zuten Bilbon milaka lagunek.
Gaur bete dira hamaika urte, Espainiako Auzitegi Nazionalaren aginduz, Guardia Zibilak "Euskaldunon Egunkaria" itxi zuenetik. Xabier Oleaga Erandioko semea, Martxelo Otamendi, Iñaki Uria, Txema Auzmendi eta Joan Mari Torrealdai epaitu zituen Auzitegi Nazionalak, 2009ko abenduan hasi eta 2010eko otsailaren 1ean amaituta. Fiskalak nahiz defentsak absoluzioa eskatu zuten auzipetuentzat, "Egunkaria"k ETArekin loturarik izan ez zuela-eta, eta Dignidad y Justicia eta AVT elkarteek, berriz, 12 eta 14 urte arteko espetxe zigorrak. Bada, 2010eko apirilean emandako ebazpenean Auzitegi Nazionalak absolbitu egin zituen: hala ere, auzi ekonomikoa zabalik dago oraindik. Baina, hori ez da Auzitegi Nazionalean epaituko, Gipuzkoan baizik. Jose Maria Vazquez Honrubia epaileak 2010eko maiatzaren 5ean kaleratutako autoan (pdf) "Egun Karia" (sic) itxi zuteneko auzi nagusian absoluzio epaian "delitu terroristaren" zantzurik agertu ez zenez, auzi ekonomikoa epaitzeko eskuduntzarik ez zuela deliberatu zuen. Hori dela eta, 2003tik izan zuen espedientea Donostiako Epaitegi Dekanotzara eskualdatu zuen, Gipuzkoan dagokion epaitegiari banatu ziezaioten. Bere aldetik, Dignidad y Justicia herri akusazio bakarra Egunkariaren auzi ekonomikotik kanpo utzi zuen behin betiko 2011ko abenduan Donostiako Auzitegiak. Epaitegiak adierazi zuen talde ultraeskuindarrak ez duela zilegitasunik Egunkariaren auzi ekonomikoan herri-akusazio izateko, bertan ez delako terrorismo deliturik epaitzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun