Larunbat honetan, martxoak 1, inauteriak ospatu dituzte Barrikan, tokiko Udal Kultur Aretoak antolatuta. Horrenbestez, 18:00etatik aurrera, makillaje tailerra eta haurrentzako jokoak egongo dira frontoian. Eta, horien ostean, familia giroko diskofestari hasiera emango diote. Jaiari amaiera emateko eta indarrak berrizteko txokolatada herrikoia egongo da, non gerturatutakoek txokolate beroa eta bizkotxoak hartzeko aukera izango duten. "Eguraldi kaxkarra izatekotan, festa Nagusien Etxeko instalazioetara igaroko da", azaldu dute udal iturriek. Ogi txigortu lehiaketa antolatu du aurten ere Barrikako Udalak. Lehiakide bakoitzak ogizko dozena bat torrada aurkeztu beharko du, udaletxeko beheko solairuan, martxoaren 3an, 18:00etan. Ordu erdi beranduago hasiko dira epaileak horiek dastatzen, irabazlea zein den erabakitzeko. Horiek probatu ostean, hurbildutako jendeari ere ogi txigortuak probatzeko aukera emango diote. Lehiaketan izena emateko epea martxoaren 1ean bukatuko da, 14:00etan. Argazkian, martxoaren 3an egingo dute ogi txigortu lehiaketa.
Horretarako, parte-hartzaileek Udal Kultur Gunera jo beharko dute: Udaletxeko bidea 2, 48650 / 946 775 163 / liburutegia[abildua]barrika.net. Bakoitzak tostadak aurkezteko bandeja hartu eta horiek aurkezteko modua azalduko zaio ere. Aurten sariak ondorengoak dira: lehenengoa, bi pertsonentzako afaria Itxasgane jatetxean. Bigarrena, bi pertsonentzako afaria Milagros jatetxean. Eta hirugarrena, bi pertsonentzako afaria Iparralde jatetxean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun