Atfal Sahararen aldeko elkarteak, Sahararen aldeko Euskal Karabana solidariorako 7 tona jaki batu ditu oraingoan, Getxoko Udalarekin elkarlanean. Iaz baino tona bat gehiago. Elikagaiak udalerriko hezkuntza zentroetan eta merkatalgune batean aurrera eramandako kanpainan batu dituzte. Gainera, aurten Getxoko Futbol Eskolak 400 kamiseta, petoak eta 30 baloi eman ditu errefuxiatuen kanpamenduetara eramateko. Horretaz gain, gaur, otsailak 27, Saharako Arabiar Errepublika Demokratikoa aldarrikatu zuten 38 urte betetzen den eguna dela eta, saharar bandera eskegi dute Getxoko udaletxean, aipatu herritarrekiko elkartasuna agertu eta beren giza eskubideak, zibilak eta politikoak, aldarrikatzeko. "Bandera aldrebes jarri da, saharar herriak pairatzen duen egoera errefusatzeko, sahararrek protesta modura egiten duten moduan", azaldu dute udal arduradunek. Argazkian, ordezkari politiko getxoztarrak Sahara eta ekialdeko Europako umeei ongi etorria ematen udaletxean.
Janari bilketari dagokionez, “oso pozik gaude ekimenaren emaitzarekin, berriro ere, getxotarrek Sahararekin duten konpromiso solidarioa agerian geratu delako, are gehiago beren egoera denboran luzatzen denean, desiratutako autodeterminaziorako erreferendumaren zain”, nabarmendu du Kepa Miñambres Llona Garapeneko Lankidetza zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun