Ekintzaileen ustez, foroari emandako izena bera ("Espainia: egonkortasunetik hazkundera") "absurdua" da, "PPk munduari saldu nahi dion gezur handia" besterik ez duena islatzen. Ildo beretik, "Espainia Marka" salatu dute, egungo egoera ekonomikora ekarri erabakitzeko eskubidea ukatu, oinarrizko eskubideak murriztu, "gazteria behin-behinekotasunera zigortu" eta "langileen eskubideez barre egiten" duelakoan.
Nabarmendu dutenez, Guggenheimen bilduko diren "eredu kapitalista-neoliberalaren adibiderik garbienak" egungo "krisia eragin duen sistema bera egonkortzea ahalbidetu eta bultzatzen dutenak, klase zapaltzailearen interesen defendatzaile sutsuak eta herritarron eskubide-ukazioaren erantzule zuzenak" dira, tartean Iberdrola eta BBVAko presidenteak, Francisco Gonzalez eta Ignacio Sanchez Galan. Bi enpresa horiek "milaka milioiko irabaziak" izan arren, "langileen eskubideak zapaltzen dituzte uneoro".
Ekintzaileen arabera, 1976tik hona "alor sozioekonomikoan gutxi aldatu dira gauzak" eta hori dela orain dela 38 urteko aldarrikapenek "gaurkotasun osoa dute". Horregatik, gaurko mobilizazio guztietan parte hartzera deitu dute, "langileon duintasuna eta begirunea berreskuratzeko" eta Euskal Herriak eredu sozioekonomiko propioa eraikitzeko bidean.
"Troika eta bere konplizeak 'Go home'" lelopeko mobilizazioak, Gune plataformak deituak
• 10:00etan, manifestazioa Arriaga eta Jesusen Bihotza plazetatik.
• 16:00etan, hitzaldiak EHUko paraninfoan.
• 19:00etan, manifestazioa Euskadi Plazatik.
Okupazioak iruditan
Troikaren aurka mobilizatzera deitu dute Itzubaltzetako BBVA eta Iberdrola okupatuz
BBVA eta Iberdrolak Itzubaltzeta / Romon dituzten bulegoak okupatu zituzten pasa den ostegun goizean eskualdeko 40 bat pertsonak. Enpresetako egoitzetan hamabost bat minutuz "Troika kanpora", "Martxoaren 3an, gora langileon borroka", "lapurrak" eta antzeko beste kartelak erakusten izan ondoren bi lokalak giza kate batez lotu zituzten. Ekimen horren bidez, gaur Bilbon burutuko den Foro Ekonomiko Globalaren aurka agertzera deitu zuten. Izan ere, protestan aritutakoek1976ko martxoaren 3an Espainiako Poliziak eraildako bost langileak oroitu eta data horretan "zorigaiztoko martxoaren 3ko hartan gertatutakoa isildu nahi izan dutenak Bilboko Guggenheimen bilduko dira", Foro Ekonomiko Globalean, alegia, "orduko eta egungo krisiaren erantzukizun eta ardura osoa duen kapitalismo neoliberalari gorazarre egiteko". Besteak beste, han izango dira Christine Lagarde Nazioarteko Diru Funtsaren zuzendari gerentea, Wernwr Hoyer Europako Inbertsio Bankuko presidentea, Angel Gurria OCDEko idazkari nagusia, Joaquin Almunia Europako Batzordeko presidenteordea, Zara, BBVA, Iberdrola eta Sener nazioarteko enpresen arduradunak eta Iñigo Urkullu EAEko lehendaria. Argazkian, okupazioa BBVAko bulegoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun