Getxoko Udaltzaingoak SMS mezuak bidali eta abisuak eman eta jarri ditu inguruko zerbitzuko, ostalaritzako eta merkataritzako establezimenduetan, eta hainbat ataritan ere, denboralearen larritasunaz ohartarazteko eta oinezkoentzako eta ibilgailuentzako indarrean jarriko diren eteteen berri emateko. Esan, 16:00etatik aurrera Arriluzeko biribilgunetik ezin izango dela Kirol Portura, Ereagako hondartzara eta Portu Zaharrera pasa. Era berean, udalerriaren goiko partetik hondartzarako eta Portu Zaharrerako oinezkoentzako jaitsierak ere itxiko dira. Udaltzaingoa etengabe izango da aipatutako aldean, egokitzat jotzen dituen erabakiak hartzeko.
Gainera, herritarrei gomendioei eta neurriei kasu egiteko eskatzen zaie eta arrisku handiko guneetara ez hurbiltzeko. Aldi berean, horrelako egoeratan iragartzen diren aholkuei ere kontuan hartzeko ere eskatu du Udalak, horien artean, itsasontziak ez erabiltzea, beren loturak begiratzea; itsas kirolik ez praktikatzea eta kostaldearen ondotik doazen errepideetatik ez ibiltzea. Larrialdietan, 112 zenbakira edo Getxoko Udaltzaingoaren 944 660 202 telefonora deitzea eskatu dute.
Aurreikuspenak
Segurtasun Sailak alarma gorria ezarri du astelehen arratsaldetik aurrera eta astearteko lehen orduetarako hamar metroko olatuengatik. Azaldu duenez, olatu handiez gain, marea biziak ere izango dira, batez ere astearte goizaldean. Hori dela eta, otsailaren 2an euskal kostaldea kaltetu zuen denboralearen "ezaugarri berdinak edo larriagoak" izan ditzakeelako datozen egunetan datorrenak. Larrialdi eta Meteorologia Zerbitzuen Zuzendaritzak azaldu du astelehenean olatuek altuera "azkar" igoko da zazpi-zortzi metrotatik bederatzi-hamar metrora. Horregatik, lehen orduetan alerta laranja ezarriko dute eta 16:00etatik aurrera gorria izango da.
Itsasgora, unerik kritikoenetako bat, 18:15ean izango da. Hala ere, Segurtasun sailak esan du olatu altuenak izango diren unean, asteleheneko gauerdian, itsasbehera izango da.
Asteartean, alerta gorriak goizeko bederatziak arte jarraituko du eta ordutik eta gaueko bederatziak arte, abisu alerta laranja ezarriko dute. Olatuen altuera jaisten joango da bederatzi-hamar metrotik bost metrora, arratsaldean. Itsasgora 18:52an izango da. Larrialdi eta Meteorologia Zerbitzuen Zuzendaritzak iragarri du asteartean abisu horia ezarriko dute batez ere kostaldean izango diren 100 kilometro baino gehiagoko haize boladengatik.
Getxoko Udala babes eta prebentzio neurriak hartzen ari da, Eusko Jaurlaritzaren Segurtasun Sailak itsasaldeko arriskuagatik eta olatuen altueragatik, gaur 16:00etatik aurrera bihar 9:00etara arte iragarritako alarma gorria dela eta, tokiko iturriek zabaldu dutenez. Imanol Landa alkatearen presidentziapean bildutako Krisi Mahaiak erabaki du udal eraikin batzuen babesa indartzea eta itsasotik gertu dauden hainbat establezimenduri laguntza eskaintzea, hondartza eta itsasoaren ondoko gunetan zaintza berezia indarrean jartzeaz eta sarbideak galarazteaz gain. Ildo hokorretan, Turismoko Ereagako bulegoan (12:00etan publikoarentzat itxiko da, babesteko azken lanak burutu ahal izateko) egurrezko babesgarriak jarriko dituzte, baita lurrezko zakuak ere, egoitza horretan eta Gurutze Gorri aldean eta komun publikoetan. Elementu horiek inguruko beste lokal batzuei ere eskainiko dizkie Udalak. Une honetan, Algortako Ereaga hondartza garbitzen ari dira, azken mareak utzitako adarrak eta egur zatiak kentzeko eta bertoko hainbat tokitan harearen altuera jaisteko ere lan egiten ari dira. Ereagako igogailuaren zerbitzua gaur 16:00etan etengo dute. Argazkian, denborale batek Ereagan eragindako kalteak, artxiboko irudian / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun