Alarma gorria gaur goizeko bederatzietara arte egon da indarrean, 9-10 metroko altuerako olatuak izan baitira. Ondoren, 21:00etara arte, laranjara jaitsi dute alerta egoera, eta espero da tarte horretan olatuak 6-7 metrokoak izatea. Barnealdean, berriz, abisu horia eman du Euskalmetek haizeagatik. Maila txikiagoan bada ere, aterta egoerak jarraitzen duen arren, kalteak zenbatzen hasi dira jada hainbat erakunde. Aipatzea itsasadarrak gainezka egin zuela atzo iluntzean Erandion, hainbat kale urez betez. Algortako Ereaga hondartzari dagokionez, "itsasoak irentsi" egin zuela diote lekukoek. Hala ere, kalte gutxi eta adar eta hondakin ugari dira atzo arratsaldeko eta gaur goizaldeko olatuek Getxo udalerriko kostaldean eragindakoaren lehenengo balantzearen emaitza. "Neurri handi batean, Getxoko Udalak babesteko eta prebenitzeko indarrean jarritako neurriei esker", adierazi dute tokiko arduradunek. Une honetan garbiketa zerbitzuak Ereaga hondartza eta ingurua garbitzeko ari dira lanean, adarrak, egur zatiak eta hondakinak kentzeko. Horretarako, besteak beste, indusmakina bat eta hiru traktore ari dira lanean. Garbiketa lanek irauten duten bitartean, Ereaga hondartza ondoko oinezkoentzako pasealekua itxita egongo da, Pedro Bilbao medikuaren estatuatik (Igeretxe parean) Ola jatetxeraino. Ibilgailuen zirkulazioa zabalik dago. Argazkian, une honetan garbiketa zerbitzuak Ereaga hondartza eta ingurua garbitzeko ari dira lanean.
Kalteei dagokienez, itsasoaren indarrak Turismoko Udal Bulegoaren parean dagoen pasabideko barandaren ainguratzeko harri bat apurtu zuen. Bulego hori itxita dago publikoarentzat, kanpoaldea garbitu arte. "Atzo hartutako neurriei esker, hau da, egurra eta lurreko sakoak jartzeari esker ura ez da udal bulegoan ezta gainontzeko establezimenduetan ere sartu. Soilik Kirol Portuko hiru lokaletan aurkitu dute ur apur bat, baina berehala garbitu dute zoru-garbigailurekin", azaldu dute Getxoko Udaletik. Ereagako igogailuaren zerbitzua berriro jarri da martxan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun