Zortzi, hamar eta hamabi urteko espetxe zigor eskaerak egin ditu orain arte fiskalak akusatuentzat, baina, epaiketan ikusitakoak ikusita, egoera alda daitekeen esperantza dute epaituek. Karmelo Landa auzipetuak ohartarazi du akusatuei ez dietela inputazio zehatzik egin eta akusazio elementu pertsonalizaturik ez dela aurkeztu. Akusazioei ezin zaiela eutsi, beraz. Zigor eskaerak bertan behera uzteko eskatu dio fiskalari.
Herriko tabernak
Halere, horiek ez dira Auzitegi Nazionalera joan behar izan duten lagun bakarrak. Izan ere, 35/02 sumarioko 36 auziperatuez gain, auzian sartutako herriko tabernak kudeatzen dituzten 110 kultur elkarteen presidenteak ere egon dira Madrilen, tartean zirela Josu Iratza, Christian Reinicke, Joserra Elkoroaristizabal, Angel Sedano, Josu Cerrato, Pedro Ruiz, Josu Iturburu eta Jon Aldatz Urdulizko Iretargi, Algortako Gorrondatxe, Leioako Kurkudi, Erandioko Hegoalde, Astrabuduako Egoki, Sopelako Mikelats, Itzubaltzeta / Romoko Branka eta Berangoko Sei Herri kultur elkarteen ordezkariak. Abokatuen eskaerari jarraiki, horiek ere deklaratu behar duten egunean eta azken saioan baino ez direla agertu beharko erabaki zuen epaileak. Akusazioen arabera, "ETA finantzatzeko ezinbesteko partaide" izanda ere, elkarte horiek eta euren ordezkariak ez daude auziperatuta, baina sozietateen ondasunak bahitzeko arriskua dago.
Bost hilabeteren ondoren, martxoaren 12an amaituko da 35/02 sumarioaren ahozko saioa Espainiako Auzitegi Nazionalean. Hala ere, epaituek azken hitza eman eta auzia epaiaren zain geratu aurretik, ostegun honetan, hilak 6, aldeek behin betiko eskaera egingo dute ostegunean, eta fiskalak orain arteko eskaera alda dezakeen esperantza dute auzipetuek. Herri Batasuna, Euskal Herritarrok eta Batasuneko ordezkari izandako 36 lagunen artean dira Jose Luis Franco zein Maite Amezaga algortarrak, Galdakaon bizi den Izaskun Barbarias urduliztarra, Karmelo Landa Leioa eta Erandioko campuseko Literatura irakaslea eta hainbat urtez Getxoko Udalean lan egin eta PPk bertatik kaleratu nahi izan zuen Sabin del Bado sondikarra. Fiskalak ostegunean zigorrak eskatzen baditu, epaitegiak "konponbidearen alde aritu direnak zigortzeko" erabiliko dituela ohartarazi du Landak, Del Badorekin batera gaur egindako agerraldian. "Eta fiskalak gobernua ordezkatzen du". Hortaz, bere hitzetan, agerian geratuko litzateke Espainiako Gobernuak ez dituela aldaketak onartu, "legalizazioa" ez duela barneratu, eta, finean, ez duela konponbiderik nahi. Argazkian, otsailaren 2ko eskualde manifestazioa Algortan / © Sopela.net
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun