Sopelako herrigunea eta Larrabasterra gertuago egongo dira aurrerantzean, tokiko Udalak Iberreko igogailua inauguratu ostean. "Estrategikoa da eta azken urteetan auzokideek etengabe eskatu eta aldarrikatu duten proiektua da, batez ere Iberre inguruko auzokideek", zehaztu dute tokiko agintariek. Azpiegitura berria Iberre institutuaren alboan eraiki dute, eta Larrabasterra eta Sopelako herrigunea banatzen duen aldapa leuntzen lagunduko du. Gainera, igogailutik metro eskas batzuetara osasun zentroa eta nagusien etxea daude, eta beraz, bertako erabiltzaileek modu errazago batean heldu ahal izango dira Larrabasterratik. Horren aurrekontua 225.840 eurokoa izan da, panoramikoa da eta bere erabilera debalde izango da. Ordutegiari dagokionez, 07:00etatik 23:00ak arte zabalik egongo da. Era berean, igogailuan segurtasun-kamarak jarri dira. Argazkian, Iberreko igogailua / © Sopelako Udala.
Sopelako Udal Gobernuarentzat, "igogailua proiektu beharrezkoa eta ezinbestekoa da, inguru horretako mugikortasuna eta irisgarritasuna hobetuko duelako". Helburu horregaz, gainera, igogailuaren inguruan ere lanak egin dituzte (espaloietan, igogailura heltzeko bidean...), irisgarritasuna eta erabilgarritasuna hobetuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun