Algortako inauterietan "jaia normaltasunez garatzea eragotz dezakeen edozer gorabehera prebenitzeko, segurtasuna areagotuko du Ertzaintzak", ostiral eta larunbatean, Eusko Jaurlaritzaren Segurtasun Sailak zabaldu duenez. Hala, ertzain gehiago egongo dira herritarrak pilatzen ohi diren alderdietan, "aurreko urteetan izandako esperientzian oinarrituta". Polizia arduradunen arabera, "milaka lagun" bilduko dira, bereziki bi egunotako arratsalde eta gauean, herriko hainbat gunetan; "besteak beste, Telletxe kalean eta inguruan, Bidezabaleko metro-geltokian, Arrigunagako hondartzan, Basagoiti etorbidean, Portu Zaharrean edo Ereagako pasealekuan". Segurtasun Sailak horretako ospakizunetan "gogaikarriak edo arriskutsuak" izan litezkeen egoerak edo jarduerak prebenitu nahi ditu; "esaterako, lapurretak egitea toki eta une jakin batzuetan jende asko dagoenean; indarra edo mehatxua erabiliz lapurretak egitea, bereziki biktimatzat adingabeak dituztenak; arma zuriak edozein egoeratan erakustea edo erabiltzea; borrokak edo erasoak; sexu-askatasunaren aurkako delituak edo kalteak eragitea hiri-altzariei zein aparkatutako ibilgailuei". Argazkian, Ertzaintzaren patruila autoa Telletxen, artxiboko irudian.
Ertzaintzaren arduradunen iritziz, bestalde, "ertzainak festa-giroko lekuetan agerian egongo direnez, herritarrek bizkor jakinarazi ahal izango diete ikusten duten edozer gertaera, eta zalantzarik gabe, haren ondorioak arintzen eta azkar konpontzen lagunduko du horrek".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun