Uribe Kostako IAk plazaratutako irakurketa:
Egungo jendarte ereduan emakume eta gizonen arteko bereizketa nabarmena da, hain zuzen ere, sistema patriarkatuak berak, hala egiten duelako. Hau horrela izan dadin ordea, birproduzitu eta mantendu dadin, hezkuntzak paper garrantzitsua jokatzen du. Sistemak badaki eta horregatik, ikastetxe naiz unibertsitatean aurkitzen ditugun ereduak, bere interesetara moldatzen ditu. Modu honetan, pertsonaren beraren heziketa gauzatu beharrean, rolen baitako heziketa da euskal ikasleok jasotzen duguna, ezarritako estereotipo eta emakume/gizon bereizketan sakonduz.
Espainiako gobernuak hego Euskal Herrian ezarri nahi digun LOMCE lege arrotza dugu adibide argia: Honen bitartez, besteak beste, sexu-bereizkeria egiten duten heziguneak diru publikoz lagunduko dira. Gainera, emakumeok pairatzen dugun zapalkuntzaren inguruko inolako lanketarik ez du planteatzen curriculum osoan, berriro ere, hezkuntza sistema hetero-patriarkalaren tresnatzat erabiliz.
Ikasle Abertzaleok ez dugu eredu honekin bat egiten. Guk geuk eraikiko dugun Euskal Eskola Nazionala parekidea eta hezkidetzailea izan behar duela uste eta nahi dugulako, hots, genero eta aukera sexual eta abarretatik eratorritako bereizkeriak gainditu eta pertsonak hezten dituen eskola bat nahi eta behar dugulako, modu honetan, jendarte parekide baten partaide izango diren herritarrak heziz.
Euskal ikasleok besteko jendarte eredu bat nahi dugu eta hori lortzeko hezkuntza hezkidetzaile baten beharra ikusten dugu. Horregatik, ezinbesteko borroka gisa ulertzen dugu, egungo ikastetxe eta unibertsitatean ezartzen zaigun hezkuntza eredua, sistema patriarkatuaren interesetara dagoena, irauli eta hezkidetza gure heziketaren oinarri gisa kokatzea.
Guztion ardura da hezkuntza parekide baten aldeko borrokak garatu eta bestelako jendarte parekide eta askatzaile baten mesedetan eragitea, beraz, , borroka femistarekin bat eginaz, goazen patriarkatua irauli eta eskola hezkidetzailea eraikitzera!
Ikasle borrokaz lortuko dugulako, gora Euskal Herri feminista!
Bilgune Feministak etzirako deitutako eskualde manifestazioarekin bat egin du IAk
Martxoaren 8ko Emakumeen Nazioarteko Egunari begira, eskualde mailako manifestazioa deitu du larunbat honetarako Euskal Herriko Bilgune Feministak. Hitzordua 19:30ean jarri dute Algortako Telletxe plazan; eta bertan Inauteriak ospatzen ibiliko direnez, mozorrotuta joateko eskatu dute. Bada, Uribe Kostako Ikasle Abertzaleak (IA) antolakundeak deialdi horrekin bat egin dute. Ildo horretan, "Espainiako Gobernuak Hego Euskal Herrian ezarri nahi duen LOMCE lege arrotza" ikastetxe zein unibertsitatean ematen den emakume / gizon bereizketaaren "adibide argia" dela salatu du eskualdeko IAk. "Honen bitartez, besteak beste, sexu-bereizkeria egiten duten heziguneak diru publikoz lagunduko dira. Gainera, emakumeok pairatzen dugun zapalkuntzaren inguruko inolako lanketarik ez du planteatzen curriculum osoan, berriro ere, hezkuntza sistema hetero-patriarkalaren tresnatzat erabiliz", adierazi du ikasle antolakundeak. Argazkian, hezkidetzaren aldeko elkarretaratzea Itzubaltzeta / Romoko Romo-Artatza institutuan, artxiboko irudian / © Uribe Kostako IA.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun