Hainbat auzipeturi karguak kendu eta zigor eskaerak jaitsi dizkie gainontzekoei fiskalak
35/02 sumarioko auzipetuek asteartean jakinarazi bezala, Espainiako Auzitegi Nazionalean egiten ari zaizkien epaiketan, aldeek behin betiko eskaera egin dute gaurkoan. Bederatzi auzipeturentzat akusazioa kentzeko eskatu du fiskalak. Beste bostentzat, berriz, lau urte eta sei hilabeteko zigorra eskatu du fiskalak. Horien artean da Karmelo Landa Leioa eta Erandioko campuseko Literatura irakaslea. Bi urte eta bi hilabeteko eskaerak egin ditu hamairurentzat; tartean direla Jose Luis Franco zein Maite Amezaga algortarrak, Galdakaon bizi den Izaskun Barbarias urduliztarra eta hainbat urtez Getxoko Udalean lan egin eta PPk bertatik kaleratu nahi izan zuen Sabin del Bado sondikarra. Gainontzekoentzat bi urte eta sei hilabeteko eskaerak egin ditu fiskalak. Guztien absoluzioa eskatu du, ordea, defentsak; gizartearen sektore handi bat sistema politikotik baztertu dela salatu dute abokatuek. Bost hilabeteren ondoren, martxoaren 12an amaituko da 35/02 sumarioaren ahozko saioa. Argazkian, otsailaren 2ko eskualde manifestazioa Algortan / © Sopela.net
Fiskalak gaur zigorrak eskatzen bazituen, epaitegiak "konponbidearen alde aritu direnak zigortzeko" erabiliko dituela ohartarazi zuen Landak, Del Badorekin batera asteartean egindako agerraldian. "Eta fiskalak gobernua ordezkatzen du". Hortaz, bere hitzetan, agerian geratuko litzateke Espainiako Gobernuak ez dituela aldaketak onartu, "legalizazioa" ez duela barneratu, eta, finean, ez duela konponbiderik nahi.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun