Laster hasiko dira eraikitzen Telleria Vacanteko etxebizitza tasatuak, Leioako Udalak aste honetan zabaldu duenez. Guztira 34 etxe izango dira, eta izena emateko Rolirka enpresako bulegoan egin beharko da (Estartetxe 5, 2 pisua, 205. departamentua) apirilaren 4ra arte. "Deialdi honetako Udal Etxebizitza Tasatuen esleipedun izateko gehienezko diru-sarrerak 1,3 indeizera haztatu beharko dira, Erregimen Orokorreko BOEekin alderatuta. Halaber, Leioako Udalak udalerriarekiko lotura irizpideak ezarri ditu", tokiko iturriek azaldu dutenez. Gauzak horrela, etxebizitzok lehenik eta behin leioaztarrentzat izango dira, hau da, azken sei urteotan gutxienez hiru urtez Leioan erroldatuta egon diren herritarrei. Aurreko kolektiboari etxebizitza guztiak esleitzen ez bazaizkio, gainerakoak Leioan lan egitearen irizpidepean eskainiko dira (hiru urtez azken sei urteotan). Eta azkenik, aurreko bi kolektiboei etxebizitza guztiak esleitzen ez bazaizkie, gainerakoak edozeini eskainiko zaizkio, Leioako errolda baldintzak edo Leioarekin lan-lotura baldintzak bete ez arren. Argazkian, etxebizitzak eraikitzeko lanak Leioan, artxiboko irudian / © Leioako Udala.
Esan bezala, eskabideak Rolirkako bulegoan aurkeztu beharko dira apirilaren 4ra bitartean, Estartetxe kaleko 5.zenbakiko 2. pisuan, 205. departamentuan; astelehenetik ostiralera, 10:00etatik 14:00etara eta 16:00etatik 19:00etara. Eta ostiraletan 10:00etatik 14:00etara. Promozioari buruzko informazio guztia www.artazaparkea.com web gunean dago ikusgai, 944 022 735 edo 638 083 668 telefono zenbakietan, edota info[abildua]artazaparkea.com helbide elektronikoan galdetuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun