Plentziako Astillero plazan elkarretaratzea egitera deitu dute makina bat kolektibok, "Indarrak batuz, emakumeen gorputza, emakumeen eskubidea", lelopean. Besteak beste, honako eragilek deitu dute ekimena: Araldi, langabetuen asanblada, Danontzat gaztetxea, Barrikako Emakumeen Hitza elkartea, Ernai, Isertegi kultur elkartea, Kandelaria, Legarrondo euskara taldea, Plentzia eta Gorlizko Gazte Asanblada eta Plentzia TeleBista.
Mankomunitateko ekitaldiak, goizez
Uribe Kostako Zerbitzu Mankomunitateak ere larunbatean egingo du ekitaldi nagusia: goizeko 9:30ean (izena emateko 09:00etan) abiatuko da Plentziatik mendi martxa. Berangotik, berriz, bizikletaz abiatuko dira 10:30ean. Horiek guztiak 12:30ean Armintzako frontoira heltzea espero dute antolatzaileek. Izan ere, 13:00etatik aurrera egingo dute bertan ekitaldia, Emakumeen Hitza elkarte barrikoztarrak antzerkia eskaini eta mankomunitateko arduradunek adierazpena irakurriko dutela.
Igandean ere, aldarrikapena nagusi
Azkenik, Sopelako Asanblada Feministak deituta, "Abortu libre, doakoa eta askearen alde!" izeneko bideoa filmatuko dute Jauregizar plazan, igande arratsaldean, 16:30ean hasita. Antolatzaileek azaldu dutenez, "Gallardonek aurkeztutako aurreproiektuaren kontrakoa" izango da bideoa eta sopeloztar guztiei parte hartzea eskatu diete, lege egitasmoarekiko "herri osoaren desadostasuna adierazteko". Horren aurretik, Berangoko Emakumearen Elkarteak antolatutako martxa igande goizean izango da, taldearen egoitzatik 10:00etan irtengo delarik. Gero, 12:30ean, “Berdintasunaren aldeko jaia” ospatuko dute frontoian.
Abortatzeko eskubidea eta berdintasuna aldarrikatuko dituzte bihar Uribe Kostan
Emakumeen Nazioarteko Eguna dela eta bateratze ugari deitu dituzte Uribe Kosta eta Erandioko emakumeen elkarte, administrazio publiko zein eragile feministek. Gauzak horrela, bihar, martxoak 8, ez dira gutxi izango aldarrikapen ekintzak. "Inposatutako legeen gainetik... Gora emakumeon borroka!" lelopean, hainbat ekitaldi deitu ditu Itzubaltzetako Emakumeek Asanbladak (IEA). 11:00etan bizikletada egingo dute eta 13:00etan manifestazioa eta batukada, Santa Eugenia plazatik abiatuta. Ordu horretan bertan, "Gure gorputza. Gure territorioa. Gure erabakia" lelopean, elkarretaratzea izango da Leioako Boulevard-ean, tokiko Bilgune Feministak deituta. Erandioko Txoko Feministak, berriz, "Dantzatu zure baginari darion suaren pare!" lelopean deitu ditu ekitaldiak. Horien artean, 18:00etan kontzentrazioa egingo dute Erandioko metro geltoki parean. Ordu berean, baina Barrikako Ander Deuna kultur aretoan, Emakumeen Hitza tokiko emakumeen elkarteak manifestuaren irakurketari ekingo dio. Eta Algortako Bilgune Feministak 19:30ean hasiko du eskualdeko kalejira Telletxen; eta ondoren ekitaldia San Nikolas plazan. Barrika, Gorliz eta Plentziak, ordea, ekimen propioa landuko dute arratsaldeko 20:30ean. Argazkian, zerbitzu publikoek kaleratutako gehiengoa emakumezkoak direla salatu du LAB sindikatuak gaur eguerdian, Algortako Bidezabalgo osasun-etxean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun