Getxoko Udaltzaingoak gidari bat atxilotu zuen igandean, bide segurtasunaren kontrako delitu bat egotzita. Udal iturriek zabaldutakoaren arabera, atxiloketa 06:30ean izan zen Algortako Martikoena kalean, udaltzainek "ibilbide irregularra zeraman, kontrako erreitik zebilen eta bihurgunea hartzeko espaloira igo zen kotxe bat" ikusi zutenean. Egoera horrek ekar zezakeen arriskua ikusita, ibilgailua gelditzea agindu zuten. Gidaria, 53 urteko gizonezkoa, edari alkoholikoen eraginpean zegoenaren seinaleak ikusi zituzten. Alkoholemia-proba egin zioten eta horretan 0,60mg/l eman zuen, baimendutakoaren bikoitza baino gehiago, adierazi dutenez. Udaltzainek atxilo eraman zuten bide segurtasunaren kontrako delitua egitea egotzita eta auzia ikertzeko polizia-eginbideak egiten ari dira, Getxoko Guardiako Epaitegira bidaliko direnak, epaiketa azkarraren prozedurapean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun