Besteak beste, "Expansión" ekonomia egunkariak zabaldu du Jaureguizar enpresa eraikitzaileak hartzekodunen aurre-lehiaketan sartu dela. Leioako EH Bilduk gogoratu duenez, aipatu sozietatea da lurzoru publikoan eraikiko diren Torresoloko babes ofizialeko etxebizitzen kooperatiba sustatzen ari dena. "Leioako ehun herritar baino gehiago kooperatiba honen partaide dira", oharatarazi du koalizio ezkertiarrak. Hori dela eta, EH BIlduk "leioaztar hauek dauden arrisku egoeragatik kezka" agertu eta, hurrengo Hirigintza Batzordean, proiektua dagoen egoerari buruzko informazioa emateko eskatuko du. "Beste batzuetan salatu dugun bezala, EAJ eta Ezker Batua Leioako Udalean garatzen ari diren etxebizitza politikaren ondorioz, hots, lurzoru publikoa BOE kooperatiba pribatuei salmentan oinarritua, leioaztarren gain jartzen du operazioaren arrisku ekonomiko osoa. Ohikoa da honelako promozio batean parte hartzeko herritarrek 30.000 euro inguru aurreratu behar izatea", salatu dute soberanistek. Argazkian, etxebizitzak egiteko lanak Torresolo inguruan / © Leioako Udala.
Helarazitako prentsaoharrean gaineratu dutenez, "EAJ eta Ezker Batuaren Leioako Udal Gobernuak badaki herritarrak direla arriskua bere gain hartzen dutenak, Barakaldon Sefranitoko BOEkin gertatu zena aurrekari argia da". "Dirudienez bi alderdi hauei honek ez die batere axola, nahiago dute Jaureguizarrek lurzorua erostegatik ordaindutako hiru milioi euro inguru poltsikoratzea", dio Leioako EH Bilduk. Amaitu dutenez, "guk argi dugu Etxebizitza Eskubidearekin ez dela jokatzen eta are gutxiago lurzoru publikoak eraikiko denarekin".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun