Eskaerak banan-banan egingo dituzte, modu pertsonalean, baina hiru ildo nagusiri jarraiki. Dispertsioak eragin dien kaltea azalduko dute zatietako batean; beste batean, irekitako prozesuarekiko konpromisoa eta norberaren ardura aztertzeko prestutasuna adieraziko dute; eta amaitzeko argudio juridikoak erabiliko dituzte. Aitzitik, ikusteke dago Espetxe Zuzendaritzaren erantzuna zein izango den.
Gaixo larriek eta 70 urtetik gorakoek Espetxe Legearen 100.2 artikulura joko dute euren egoera alda dadila eskatzeko. Tratamendu Batzordeak presoa 2. edo 3. gradura aldatu edo ez gomendatuz txostena igorriko dio Espetxe Zuzendaritzari, eta honek erabakiko du azken finean. Gradu aldaketak hainbat onura ekar dakieke egoera larrian dauden presoei, hala nola zigorra etxean igarotzea edota eskumuturreko telematikoen bidez kalera irtetea. Antzeko egoeran dauden beste preso batzuei ere ezarri diete espetxealdi arindua lehenago ere.
Garak dioenez, Tratamendu Batzordeak gehienez sei hilabete ditu biltzeko, eta balizko gradu aldaketa edo hurbilketen inguruko erabakiak denboran zehar gorabeherak izan ditzakete, espetxe bakoitzaren arabera.
"Berria" eta "Gara" egunkariek gaur zabaldu dutenez, gaixotasun larriak dituzten presoak eta 70 urtetik gorakoak hasi dira, Euskal Herrira hurbiltzeaz gain, aske geratzeko eskaera ofiziala egiten. Orotara, EPPK Euskal Preso Politikoen Kolektiboaren hamasei kide dira pauso hori eman dutenak, Etxerat elkarteak plazaratutako zerrendaren arabera. Lehenengo eskaeren tramitazioa martxoan amaituko dela aurreikusi dute. Ondoren, eskaerak multzoka egingo dituzte EPPK-ko kideek, kartzelan daramaten denboraren arabera eta hemendik ekaina bitartean. Gauzak horrela, apirilean, espetxean 20 urtetik gora daramatzatenek egingo dute Euskal Herrira hurbiltzeko eskaera. Tartean daude EPPK-ko zuzendaritza osatzen duten hogei kideak. Gero 15 urte, 10 urte eta azkenik 5 urtetik hona espetxeratutakoek. Espainiako ziegetan daudenek Zaballako espetxera lekualdatzea eskatuko dute, eta Frantziako Estatuetako espetxeetan daudenek etxetik gertuen dagoen kartzelan biltzea. Bada, astelehenean Topas (Salamanca) espetxetik aterako den Iñigo Otazua Urresti "Oti" algortarra kenduta, egun Euskal Preso Politikoen Kolektiboa osatzen duten lagunen artean Uribe Kostako 26 bizilagun dago. Horietatik bost Frantziako espetxeetan dira eta gainontzekoak Espainiakoetan. Argazkian, presoen aldeko manifestazioa Algortan, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun