Aurreko ekitaldian indarrean zegoen aurrekontuaren luzapena joandako urtarrilean onartu zuten Getxoko Udalean. Bada, orain bi asteazken, hilaren 5ean, 2014rako 98,3 milioi eurora (iaz baino %1 gutxiago) heltzen den aurrekontu proposamena aurkeztu zuen EAJren Gobernu Taldeak; baita gainerako talde politikoekin negoziazio-prozesu bat irekiko duela iragarri ere, egin beharreko aldaketak erabakitzeko. Gaurkoan, proposamena "berandu" heldu dela esateaz gain, horretan jasotako "helburu" bakoitzean "gezurrak baino ez" daudela adierazi du Getxoko EH Bilduk.
Gezurren artean "larriena", Gizarte Politiketan topatu omen dute: "2014an egoera zailenean dauden familiei IBI eta bestelako zergak ordaintzen laguntzeko 233.000 euroko poltsa gordeko duela esaten du EAJk Getxoberrin. Gezur galanta!", aurpegiratu diete Nerekanek eta Saituak udal agintariei. Diru kopurua eta IBI, estolderia eta zaborrak ordaintzen laguntzeko diru laguntza lerroa EH Bilduren proposamenez jarri zen martxan 2013an eta bi deialdi egin dira. Baina, "EAJk ez du 2014an diru laguntza deialdia egiteko asmorik eta aurreko deialdien dirua erabiltzen du herritarrak engainatzeko", EH Bildukoek salatu dutenez.
Getxoko EH Bilduk EAJren Udal Gobernuari emandako erantzuna (pdf)
Romo Kultur Etxeari buruzko erreferenduma eskatu du EH Bilduk Getxoko aurrekontuak negoziatzen hasteko
2014rako aurrekontuen proposamena "berandu" heldu dela erantzun dio gaur Getxoko EH Bilduk EAJren Udal Gobernuari. Koalizio ezkertiarraren iritziz, aurrekontuak martxoan jasotzeak jelkideek "negoziaketa sakon bat egiteko borondaterik ez" duela erakusten du. Maitane Nerekan eta Bingen Saitua zinegotziek prentsaurrekoan gaineratu dutenez, "zirriborroa irakurtzen ezer berririk ez dago. Antzokiaren eta Kultur Etxearen distiraz itsuturik, ez dute beste inbertsiorik egiten". Hautetsi subiranisten hitzetan, "horrek herritarrekin eseri eta euren kezkak kontuan hartzera eta oposizioko taldeekin negoziatzera behartuko lituzkeelako". Hala ere, EH Bildu 2014ko Getxoko aurrekontuei buruz hitz egiten hasteko prest agertu da, beti ere gutxieneko puntu batzuk jasotzen badira. Horien artean, Itzubaltzeta / Romoko Kultur Etxearen proiektua birplanteatzea eskatu diete ezkertiarrek EAJkoei, birdimentsionatuz eta kostuak murriztuz. "Aurretik Getxoko herriak erreferendum naten bidez aukeratu beharko luke zein Kultur Etxe mota eraiki", gaineratu dutenez. Argazkian, Romo Kultu Etxearen obren ondoan egin dute agerraldia Getxoko EH Bilduren ordezkariek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun