Goizeko 9:30 inguruan hasi dira "Kalean da Oti!" irakur zitekeen mezuak sare sozialak betetzen. Horiekin batera, dagoeneko preso politiko ohia den Iñigo Otazua Urresti "Oti" algortarra Topas espetxeko ateak nola zeharkatzen zituen ikus zitezkeen argazkiak eta bideoak. Algortako laguna 09:00ak aldera atera da Salamanca aldeko kartzelatik, gertukoek UKBERRI.NETi adierazi diotenez. Espetxeko atarian lehen harrera egin diote senide eta lagunek. Bestalde, Guardia Zibilak kontrola jarri du kartzela aurrean eta bertaratutakoak identifikatu ditu. Euskal Herrirako bidean da jada Otazua eta arratsaldean Algortara iristea espero da. Zigorra osorik beteta atera da kalera algortarra. 1994ko urriaren 25ean atxilotu zuten Areetako Bizkaiko Zubiko plazan, Iñaki Gonzalo Casal "Kitxu" itzubaltzetarrarekin eta Andoni Muñoz de Vivar urduliztarrarekin batera; baita, Algortako bere etxean zigorra etxean betetzen ari zela, 2013ko martxoaren 14an zendutako Angel Figueroa Fernandezekin ere. Hain zuzen, ostiralean izan zen urtebete preso politiko gaixo algortarra hil zenetik. Argazkian, sare sozialetan dabilen argazkietako bat.
Lanbroa komandoko kideak izatea eta zauriturik gabeko hiru lehergailu jartzea leporatu zieten lauei, 30 urteko zigorra ezarriz. Aurretik Carabanchel, Alcala-Meco eta Cuencako espetxeak ere ezagutu dituen arren, azken 14 urtetan Salamanca aldean, Topasen, izan dute Oti, Algortatik 489 kilometrora.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun