Iñigo Otazua Urresti "Oti" Topas (Salamanca) kalera ateratzeko hiru egun baino ez zirela falta bete zen urtebete, ostiralean, Anjel Figueroa Fernandez preso politiko algortarra etxean hilda aurkitu zutela. Azken hori Langraizko espetxetik atera eta etxera eraman zuten 2008ko azaroaren 12an, bertan zigorra bete zezan, gaixotasun larri eta sendaezina zuelako. Zoritxarreko data martxoaren 14koa Figueroa Fernandez familiarentzat: joan den ostiralean ere bete ziren 17 urte Anjelen amama, Antonia Hernandez Rodriguez, auto istripu batean hil zela Alcala-Meco espetxera bidean, bere biloba bisitatzera zihoanean. Bada, aipatu egunean ekitaldi xumea egin zuten Algortan, Antonia eta Anjel, amama eta biloba, gogoratzeko. Bertsoak zein lore sortak eskainiz oroitu zituzten biak. Aurretik, Etxerat elkarteak deituta, 200 bat lagunek egin zuten manifestazioa Algortan barrena, "Dispertsiorik ez! Preso gaixoak etxera!" lelopean. Argazkia: cc-by Algortako Herri Bilgunea.
Gaur askatasuna berreskuratu duen Iñigo Otazua algortarra Figueroarekin batera atxilotu zuten 1994ko urriaren 25ean Areetako Bizkaiko Zubiko plazan. Dagoeneko kalean den Iñaki Gonzalo Casal "Kitxu" itzubaltzetarra eta bere burua "Langraizko bidean" kokatu zuen Andoni Muñoz de Vivar urduliztarra ere atxilo hartu zituzten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun