Getxoko PPk Kultur Etxeko zuzendaria den udal langilearen kargu-uztea eskatu du. Bildutik argi dugu PPren eskaria irabazi mediatiko eta politikoak lortzeko bidean eginda dagoela eta EAJrekin lehiatzeko duen dinamikaren barruan kokatzen dela. Hala ere, EAJk udal komunikazio baliabide eta, kasu honetan, udal teknikariez egindako erabilera guztiz salagarria dela uste dugu eta horregatik atzo, martxoak 17a, egin zen Kultur Etxearen Batzordean, aipatu prentsa aurrekoaren inguruko azalpenak eskatzeaz gain, udal teknikari eta langileen erabilera alderdikoia salatzen duen adierazpen publikoa exijituko genuen.
PPk egindako kargu-uzte eskariaren aurrean, aldeko bozka bat eta kontrako bozka bat eman genuen, ez baitugu uste Kultur Etxeko lehendakaria den udal langilea aipatu prentsa aurrekoaren arduradun gorena denik eta beraz, ez dugu uste bera zigortu behar denik, horren atzean dagoen komunikazio arduraduna eta alkatea baizik. Hala ere, esan bezala, oso larritzat dugu EAJren portaera Itzubaltzeta / Romoko Kultur Etxearen inguruko lanketa komunikatiboan eta horregatik aldeko bozka bat eman genuen.
Getxoko EH Bildu
Bildu Getxoko udalean sartu eta hilabete batzuetara EAJren Gobernu Taldeak arau berezia atera zuen oposizioko taldeetako zinegotzien eta udal sail ezberdinetako teknikarien harreman zuzena debekatuz. Informazioa eskatzeko sail bakoitzeko zinegotzi arduradunarengana jo behar dugu, horrek gure lana nabarmen zailtzen badu ere. Kontrara, 2014ko otsailaren 21ean alkateak, bere taldeko beste bi zinegotzik eta bi udal langilek prentsa aurrekoa eman zuten Itzubaltzeta / Romoko Kultur Etxearen inguruan eta, ustez, horren ondorioz hutsik geldituko diren bi udal eraikinetan egin behar diren etxebizitza sozialen inguruan informatzeko. Azken hau, oposizioko taldeekin sekula landu ez den erabakia, horren inguruan espresuki galdetu badugu ere eta, guk dakigula, Gobernu Batzordetik ere pasa ez dena. Beraz, EAJk barne mailan landu duen proposamen bat aurkezteko udal langileak jarri zituen alkateak kamara aurrean. Hori publikoki salatu genuen otsaileko osoko bilkuran Bildukook. Larria da oso EAJk udal komunikazio tresnez (irratia, astekaria, prentsa aretoa, prentsa aurrekoak, bandoak eta abar) egiten duen erabilera alderdikoia. Argazkian, Manu Alkiza Getxoko Kultur Etxeko Zuzendaritza Batzordeko kudeaketa zuzendaria, bigarrena eskumatik, otsaileko prentsaurrekoan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun