Besteak beste, Leioako Gure Esku Dago taldeak informazio puntua izango du martxoko astelehen eta ostegunetan Sabino Arana kaleko 65. atariko lonjan, Leioa okindegiaren alboan. Bertan, aukera egongo da giza-katerako metroa erreserbatzeko, zalantzak uxatzeko eta plataformaren materiala eskuratzeko, beti ere 18:00etatik 20:00etara bitartean. Bestalde, igande honetan, martxoak 23, mosaiko erraldoia egingo dute. Hitzordua 12:00etan jarri dute Bulebarrean.
Itzubaltzeta / Romon, berriz, astelehenero batzen dira kultur etxean, 19:45ean.
Aste honetan zehar, Sopelan, "album ibiltaria" eskuz-esku ibiliko da Laiak tabernan. "Gerturatu, kuxkuxeatu, komentatu, sinatu, egin zure argazkia, itsatsi, bidali... Zuen argazkien zain gaude!", adierazi du Sopelako Gure Esku Dago taldeak. Igandean metro eta kamiseta salmenta egingo dute, 12:00etan, udaletxeko plazan.
Algortari dagokionez, larunbatero, 12:00etatik 14:00etara jartzen dute postua Telletxen.
"Erandio martxan" ekimenaren kartela
Igandean Astrabuduan egindako ekitaldiaren bideoa
Erabakitzeko eskubidea aldarrikatzeko asmoz, igande honetan, martxoak 23, "Erandio martxan" izeneko ekitaldia egingo dute, Gure Esku Dago plataformaren tokiko taldeak deituta. Horrenbestez, goizeko 10:30ean aldi berean abiatuko dira oinez Altzagako metro geltokitik zein Astrabuduko Josu Murueta plazatik, Erandio Landara heltzeko. Bertan, tailerrak, herri kirolak, bazkaria eta dantzaldia izango dituzte parte-hartzaileek. Hain zuzen ere, bazkarirako txartelak La Plaza, Goiko, Dandaka, Primera Linea eta Genaro tabernetan salgai daude jada, 9 eurotan. Datorren ekainaren 8an Iruñea eta Durango batuko dituen jende katea osatu dadin atsedenik hartu gabe lanean ari dira Gure Esku Dago plataformak Uribe Kostan sortu dituen taldeak. Hitzordurako hilabete gutxi falta direla, erabakitze eskubideak sentsibilitate ezberdinetako militanteak batu ditu jada Erandion, Leioan, Itzubaltzeta / Romo eta Areetan, Algorta eta Getxon, Berangon, Sopelan eta Gorlizen. Uribe Kostari dagozkion Elorrio (Leioa), Arrasate (Erandio) eta Antzuolako (eskualdeko beste udalerriak) kilometroak jendez hornitzeko, han-hemenka izan dira, helburuak azaltzen, metroak banatzen eta autobusak antolatzen. Argazkian, joan den igandean argazki erraldoia egin zuten Astrabuduan / © Gure Esku Dago Erandio.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun