Getxoko Udaltzaingoak 30 urteko gizonezkoa atxilo eraman du gaur goizaldean, 27 urteko bere bikotekideari botila batekin aurpegian jo eta hormaren kontra bultzatu duelakoan. Atxiloketa ordubiak aldera izan da. Getxoko Udalak zabaldutakoaren arabera, Udaltzainek ikusi dute iskanbila zegoela taberna baten kanpoaldean. Tabernara inguratu eta biktima eta lekukoengandik gertatukoaren inguruko informazioa jaso ondoren, ustezko erasotzailea identifikatu eta atxilotu dute, tabernan bertan zegoela. Erasoaren biktima Gurutzetako ospitalera eraman dute, eta polizia-eginbideak abiarazi dituzte gertatutakoa ikertzeko. Getxoko Guardiako Epaitegira bidaliko dituzte polizia-eginbideak. Horrelako oldarraldien aurrean ohi duen bezala, Keltse Eiguren Berdintasuneko zinegotziak ustezko erasoa gaitzetsi eta gogoratu du “indarkeria sexista giza eskubideen urraketa larria" dela. Argazkian, pasa den martxoaren 8an Algortan egindako manifestazio feministaren bukaera.
Era berean, Eigurenek tratu txar fisiko edo psikiko jasaten dituzten emakume biktimak Gizarte Zerbitzuetara (944660151) jotzeko animatu ditu, han egoeratik ateratzeko laguntza emango baitiete. Eigurenek gogoratu du Udaltzaingora (944 660 202) edo Ertzaintzara (944 063 420) ere joan daitezkeela eta baita Eusko Jaurlaritzaren tratu txarren biktimen telefono zenbakira (900 840 111) eta Sos Deiak-era (112) deitu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun