Etxerat elkartearen mozioa:
25 urte betetzen dira aurten Espainiar Estatuak euskal presoen sakabanaketa era orokorrean martxan jarri zuenetik. Legeria Penitentziario eta Nazioarteko hitzarmen desberdinetan onartutako Giza Eskubideen kontrakoa den neurri honek, kartzela zigorpean dagoen presoari ezezik, senideon eta lagunen inguruneari neurrigabeko sufrimendua eta mina sortzen digu. Praktikan, presoak eta beren senitarteko eta lagunok ordaindu behar dugun zigor gehigarria da.
Estatu espainiar zein frantziarrak urteetan zehar gauzatu duen kartzela politikaren ondorioz, 22 euskal preso eta 16 senitarteko eta lagunek galdu dute bizitza, eta hamarnaka zauritu utzi ditu. Kartzelako bizi baldintza jasangaitzak eragindako heriotzak dira batzuk. Dispertsatu eta urrunduak zituzten senitarteko eta lagunak bisitatzera zihoazela bidean hildakoak beste batzuk.
Ondo ikasia dugu hau getxotarrok. Martxoaren 14ean galdu baitzuten euren bizia gure bi herrikidek. 2013 urtekoan, espetxealdi gogor eta luze baten ondorioz gaixo larri zen Angel Figeroa zendu baitzen bere etxean. 16 urte lehenago, 1997an, bere amamak, Antxoni Fernandezek, galdu zuen bizia Aranda de Dueroko errepide bazter batean, Angel bisitatzera Alcala Meco kartzelara bidean izandako auto istripuan.
Gure senideak dispertsatuta egotearen ondoriorik latzena. Sakabanaketak eragindako biktima ahaztua. Ordutik beste hainbat euskal herritarrek galdu dute bizitza sakabanaketa politikaren ondorioz. Nahikoa da! Esateko garaia iritsi da. Nahikoa da bidai luzeak egiteaz, gure bizitzak astebururo arriskuan jartzeaz, gastu ekonomiko neurrigabeez, txarragotze fisiko eta sikikoaz, ezin bidaiatu dauden nagusi eta haurrez… Nahikoa da!
Euskal Herrian gatazkaren konponbiderako aukera paregabea ireki den honetan, sufrimendu guztiak kontutan hartu eta beste etorkizun bat eraikitzeko garaia da. Preso dauden gure senideen bakartze eta sakabanaketarekin bukatzeko garaia. Kartzeletan pairatzen dituzten bizi baldintzak hobetu eta oinarrizko giza eskubideak errespetatzeko garaia iritsi da. Egoera honek senideongan sortzen duen sufrimendu eta giza eskubide urraketekin bukatu egin behar dugu.
Hau guztia kontutan hartuz, honako puntu hauek aurkezten dira Osoko Udal Batzarrean, bertan eztabaidatu eta onartuak izan daitezen:
1.- Udal honek sakabanaketa politikaren ondorioz hil zen Antxoni Fernandez herritarra gogora ekarri eta omendu nahi du. Era berean kartzela politika bidegabe honen ondorioz bizitza galdu, zauritu edota edonolako sufrimendua pairatu duten guztiekin bat egiten dugu.
2.- Udal honek, euskal presoen sakabanaketa eta urruntzearekin berehala amaitzeko eskatzen du, giza eskubideak urratuz, presoen eta beren senide eta lagunengan eragiten duen sufrimendu eta zigor gehigarriarekin bukatzeko.
3.- Udal honek, euskal presoen bizi baldintzen eta orokorrean zor zaizkien eskubide guztien errespetua eskatzen du.
4.- Erabaki honen berri, komunikabideen bidez iritzi publikoari, Espetxeetako Idazkaritza Nagusiari eta Espainiako Barne Ministroari ematea.
Etxerat elkartearen izenean, Espainiar Estatuak euskal presoen aurka darabilen sakabanaketa politikaren kontrako mozioa aurkeztuko du gaurko osoko bilkuran Getxoko EH Bilduk. Batetik, "kartzela politika bidegabe honen ondorioz bizitza galdu, zauritu edota edonolako sufrimendua pairatu duten guztiekin bat" egitea eskatuko diete Udalbatzan ordezkatuta dauden gainontzeko alderdiei (EAJ, PP eta PSE-EE); bereziki Antxoni Fernandez herritarra gogora ekarriz. Aipatu emakumea 1997ko martxoaren 14an hil zen auto istripu batean Alcala-Meco espetxera bidean, bere biloba Anjel Figueroa bisitatzera zihoanean. 16 urte beranduago, 2013ko martxoaren 14an, espetxealdi gogor eta luze baten ondorioz gaixo larri zen Anjel zendu zen bere etxean. Horiek horrela, "euskal presoen sakabanaketa eta urruntzearekin berehala amaitzera" deitu du Getxoko EH Bilduk Udala; "giza eskubideak urratuz, presoen eta beren senide eta lagunengan eragiten duen sufrimendu eta zigor gehigarriarekin bukatzeko". Baita "euskal presoen bizi baldintzen eta orokorrean zor zaizkien eskubide guztien errespetua eskatzera" ere. Argazkian, hilaren 14an, Anjel Figueroa eta Antonia Hernandez gogoratu zituzten Algortan / cc-by Algortako Herri Bilgunea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun