Lekukoek adierazi dutenez, 13:00ak inguruan heldu dira Iñigo Fernandez de Martikorena UKBERRI.NET agerkari digitaleko kazetariaren etxera, Itzubaltzeta / Romora, kalez jantzitako ertzainak. Bertaratuta auzokideek, baina, nola eramaten zuten baino ezin izan dute ikusi. Bizilagunen arabera, goiz guztian ibili dira ibilgailu kamuflatuak bere zein gurasoen etxebizitzen inguruan.
Hasiera batean, Ertzaintzarekin harremanetan jarri ostean non zeukaten baino ezin izan du jakin Iñigo Santxo abokatuak. Neguriko ertzain etxean zeukaten. Zergatik atxilotu duten, baina, ez dute aipatu, letraduaren ahaleginean.
Beranduago, aipatu komisariatik bertatik deitu diote Santxori, Fernandez de Martikorenak bere defentsarako izendatu duela esateko. Bitxiena, agian, UKBERRI.NETeko kazetariaren telefonotik bertartik deia jaso duela abokatuak, ertzain-etxetik deitu aurretik; baina ezin izan du hartu beste dei batekin zegoelako.
Besteak beste, "ABC" eta "El Correo Español" egunkariek adierazi bezala, Iñigo Santxo abokatuak baieztatu egin du kazetari itzubaltzetarra, martxoaren 3an, Bilbon burutu zen Foro Ekonomiko Globalaren inguruan izandako istiluen harira zabaldutako diligentzien inguruan atxilotu egin dutela.
Neguritik Deustura
16:45 inguruan jakinarazi diote Iñigo Santxo abokatuari arratsaldeko lehen orduan atxilotutako Iñigo Fernandez de Martikorena UKBERRI.NETeko kazetari itzubaltzetarra Deustuko ertzain-etxera bidean zela, bertan deklarazioa hartzeko. Ordura arte, Neguriko komisarian eduki dute. Deustutik, Bilboko epaitegira eraman behar zuten, epailearen aurrean deklaratzeko.
Hala ere, Deustuko ertzain-etxean, hatz markak hartu eta argazkia egiteari uko egin dio itzubaltzetarrak, duela 15 urte EHNA erakutsita identifikatzeagatik atxilotu zutenean egin ziotela fitxa, arrazoirik gabe atxiki dutela, eta ez zuela berriz argazkia eta hatz markak biltzea onartuko. Horrek bihar arte atzeratu du Fernandez de Martikorenaren epailearen aurreko deklarazioa, gaua Deustuko komisarian ematera behartuz. Bestela, ondo dagoela helarazi nahi izan die gertukoei UKBERRI.NETeko kazetariak, abokatuaren bitartez. Bera atxilotzeko emandako argudioari, berriz, "aitzakia merkea" deritzo itzubaltzetarrak eta "muntaia kutsua" hartzen dio honi guzti honi. Egun horretan, Bilbon beharrean, ohi bezala lanean zela adierazi du.
Iluntzeko zortzietan 180 bat lagunek salatu dute, Itzubaltzeta / Romoko Santa Eugenia plazan, Iñigo Fernandez de Martikorena UKBERRI.NET agerkari digitaleko kazetariaren atxiloketa. Gaur, 13:00ak aldera, atxilo hartu dute bere etxean itzubaltzetarra, martxoaren 3an Bilbon burutu zen Foro Ekonomiko Globalaren inguruan izandako istiluen harira zabaldutako diligentzien inguruan. Atxilotzeko emandako argudioari, ordea, "aitzakia merkea" deritzo berak eta "muntaia kutsua" hartzen dio honi guzti honi. Egun horretan, Bilbon beharrean, beti bezala lanean zela aipatu du, Iñigo Santxo abokatuak adierazi duenez. Atxiloketaren inguruan orain arte dauden xehetasunen berri eman dute iluntzeko kontzentrazioan. Hain zuzen ere, hatz markak hartu eta argazkia egiteari uko egin ostean, bihar eramango dute epailearen aurrera Fernandez de Martikorena, letraduak jakinarazi duenez. Biharko elkarretaratze berri bat deitu dute Itzubaltzetako herritarrek, 20:00etan, Santa Eugenia plazan. Argazkian, Santa Eugenian batu dira herrikideak Iñigo Fernandez de Martikorenaren atxiloketa salatzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun