Iñigo Fernandez de Martikorena UKBERRI.NET agerkari digitaleko kazetari itzubaltzetarra atzo, 13:00ak aldera, atxilo hartu zuten bere etxean, martxoaren 3an Bilbon burutu zen Foro Ekonomiko Globalaren inguruan izandako istiluen harira zabaldutako diligentzien inguruan. Atxilotzeko emandako argudioari, ordea, aitzakia merkea deritzo berak eta muntaia kutsua hartzen dio honi guzti honi. Iñigo Santxo abokatuari komisaldegian behin eta berriro ziurtatu dionez, istiluak izan ziren egun hartan Getxon egon zen, ohi bezala.
Gora beherak ertzain-etxean
Epailearen aurrera atzo bertan eramango zuten ustea zuen hasieran abokatuak, baina UKBERRI.NETeko kazetariak ertzainekin izandako liskar batzuen ondorioz, gaur arte ez zutela eramango adierazi zioten. Gaur jakin du Iñigo Santxok gauean eraman zutela. Hala ere, magistratuak esan ei zien ertzainei bera ez zela konpetentea eta Deustuko komisariara bueltan eraman zuten kazetaria.
Hizkuntzagatik izan zituen lehen istiluak. Diligentzia guztiak euskaraz egiteko eskatu zuen itzubaltzetarrak. Ertzain euskaldunik ez zegoela eta, gazteleraz egitera behartu nahi zuten kazetaria. Atxilotuak ez zuen onartu, eta diligentziak behar baino gehiago luzatu ziren.
Polizia fitxa egiteko ertzainak hatz markak hartu eta argazkia egiten saiatu zirenean iritsi zen bigarren liskarra. Ezezkoa eman zuen Fernandez de Martikorenak; duela 15 urte EHNA erakutsita identifikatzeagatik atxilotu zutenean egin ziotela fitxa, arrazoirik gabe atxiki dutela, eta ez zuela berriz argazkia eta hatz markak biltzea onartuko.
Iñigo Santxo abokatua abisatu barik, gauean eraman zuten Iñigo Fernandez de Martikorena UKBERRI.NETeko kazetari itzubaltzetarra Bilboko Justizia Jauregira. Letraduak azaldu duenez, bertan, hamargarren epaitegiko magistratuak esan ei zien ertzainei bera ez zela konpetentea; konpetentea delako atxiloketa izan den tokitik Guardiako epaitegirik hurbilena edo bestela gaia ezagutzen duena, hau da, Bilboko zortzigarren epaitegia. Azken horretan "ez dakite ezer eta esan didate, printzipioz, ez dakitela ezer atxiloketa honetaz eta, printzipioz, ez diotela deklaraziorik hartuko", gaineratu du Santxok. Bilboko zortzigarrenean esan diote Fernandez de Martikorenaren abokatuari Guardiako epaitegira bidali beharko luketela, "baina gaur guardian dagoenak (lehenengo epaitegiak), atzo hamargarrenak esan zuen gauza bera esan beharko luke". Letraduaren arabera, aukera legal bakarra da Getxoko Guardiako epaitegira ekartzea. Hala ere, ertzainekin hitz egin eta esan diote Bilbokora eramango dutela. Orain Deustuko ertzain-etxean daukate Iñigo Fernandez de Martikorena. Bestalde, diligentziekin lotuta, Donostian atxiki zuten adingabea gurasoen zaintzapean geratu da. Argazkian, atzo bezala, gaur ere kontzentrazioa egingo dute 20:00etan Santa Eugenia plazan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun