13:45 inguruan atera da Bilboko Guardia Epaitegitik atzo Itzubaltzeta / Romon atxilotutako Iñigo Fernandez de Martikorena UKBERRI.NETeko kazetaria. Hala ere, martxoaren 3an Bizkaiko hiriburuan burutu zen Foro Ekonomiko Globalaren inguruan gertatutakoak ikertzen ari den Bilboko Instrukzio zortzigarren Epaitegiara agertu beharko da itzubaltzetarra, deitzen dutenean. Kale istiluak eta kalteak leporatzen dizkiote, ertzain batek tokian bertan "hamar metrora" ikusi zuelakoan. Fernandez de Martikorenak, ordea, behin eta berriro esan du egun horretan Itzubaltzetan zela. Barik txartelean egun horretako bidairik ez agertzeak "susmagarritzat" jotzen du Ertzaintzak, guztiz kontrakoa izan beharko lukeenean, Iñigo Santxo abokatuaren ustez. Guardiako epailearen aurrean ez du lekukotasunik eman nahi izan Romoko bizilagunak: batetik, "horretarako eskumena duen epategia Getxokoa" dela (udalerrian izan zen atxiloketa) adierazi dio magistratuari Iñigok. Bestalde, "atxiloketa beharrezkoa ez zela eta, zitazioa bidaltzekotan, aurrekoetan bezala berdin-berdin agertuko" zela esan dio. Azkenik, "mediatikoki baliotzeko atxiloketatzat" jo du berea. Gogoratu atzo bertan Donostian adingabeko bat atxiki egin zutela, martxoaren 3ko istiluetan parte hartzea egotzita. Ertzaintzak hirugarren pertsona bat atxilotu du bart Bilbon. Datozen orduotan epailearen esku utziko dutela dio Europa Press agentziak. Bitartean, Itzubaltzeta / Romoko herritarrek gaurko egindako kontzentrazio deialdia mantentzen da: 20:00etan, Santa Eugenia plazan. Argazkian, Iñigo Fernandez de Martikorena, artxiboko irudian.
Iñigo Fernandez de Martikorena UKBERRI.NETeko kazetaria atzo 13:00ak inguruan atxilotu zuten Itzubaltzeta / Romon, bere etxetik irteten ari zela. Azaldu duenez, atarian zain zituen ertzainak eta, lurrera bota zuten eta eskuak lotu. Atxiloaldiari dagokionez, "ez ondo, ez txarto" hartu egin dutela adierazi du itzubaltzetarrak. Bere hitzetan, atzo ez zioten bazkari edo afaririk eskaini, eta eskaintzekotan, "uko egingo nien", gaur goizeko gosariari bezala. Mantari ere uko egin zion, hatz markak eta DNA lagina hartzeari ezezkoa eman ostean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun