Datorren ekainaren 8an Iruñea eta Durango batuko dituen jende katea osatu dadin atsedenik hartu gabe lanean ari dira Gure Esku Dago plataformak Uribe Kostan sortu dituen taldeak. Hitzordurako hilabete gutxi falta direla, erabakitze eskubideak sentsibilitate ezberdinetako militanteak batu ditu jada Erandion, Leioan, Itzubaltzeta / Romo eta Areetan, Algorta eta Getxon, Berangon, Sopelan eta Gorlizen. Uribe Kostari dagozkion Elorrio (Leioa), Arrasate (Erandio) eta Antzuolako (eskualdeko beste udalerriak) kilometroak jendez hornitzeko, han-hemenka izan dira, helburuak azaltzen, metroak banatzen eta autobusak antolatzen. Besteak beste, gaur gauean, Hesian taldeak kontzertu akustikoa eskainiko du, 22:00etatik aurrera, Xixili tabernan. Horretaz gain, joan den asteburuko ekintaldien ostean, Gure Esku Dago ekimena Leioako kaleetara bueltatuko da egun hauetan, tokiko Udalak bere webgunearen bitartez iragarri duenez. Helburua, igandean, 17:30ean, Bilboko Casillan egingo den ekitaldia iragartzea da. Argazkian, martxoaren 16an argazki erraldoia egin zuten Astrabuduan / © Gure Esku Dago Erandio.
Azaldu dutenez, larunbatera arte, megafonia izango duen kotxea ikusi ahal izango da, Gure Esku Dago ekimenari buruzko informazioa ematen. Horretaz gain, Elexalde kalea, herri mugimendu honen pankartez jantzita egongo da igandera arte. Azkenik, bihar, eguerdiko 12etatik aurrera, informazio mahaia izango da Ikea Barri plazan, edo Sakoneta kiroldegian eguraldi txarra egonez gero.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun