Etapa berriari begira, Lauzirikaren helburuak dira fakultatean antolatzen diren ekimen eta dinamiketan ikasleen parte hartzea sendotzea, kultur eragileekin eta erakundeekin dauzkaten lankidetzarako harremanak estutzea elkarlanean proiektuak garatu ahal izateko, eta Areto Nagusiaren behealdean irekitako II Eraikinaren ondorioz fakultatean libre geratu diren esparruen banaketa birdiseinatzea espazioa ahalik eta gehien aprobetxatu ahal izateko.
Lauzirikak adierazi duenez, "uste dut ezinbestekoa dela gure fakultateak inguruko errealitate artistiko eta kulturalarekin inplikazio handiagoa edukitzea. Gure irakasle eta ikasleek fakultatetik kanpora ere oso interesgarriak diren diziplina asko lantzen dituzte eta, horregatik, baia arlo akademikoan zein gizarte osoan orokorrean, Arte Ederren Fakultatearen partaidetza eta ikuspena handiagoa izatea gustatuko litzaiguke".
Arantza Lauzirika Morea irakasle, ikerlari eta artista barakaldoarra Euskal Herriko Unibertsitateko (EHU) Arte Ederren Fakultateko dekano berri izendatu dute, eta horrenbestez, 2009tik aurrera ikastegi horretako dekanoa izan den Josu Rekalde ordezkatuko du. Lauzirika Artean lizentziatu zen EHUn eta Artea eta Teknologia Saileko doktorea da Arte Ederren Fakultatean. Telebistarako diseinu grafikoaren arloan hasi zen lanean eta bere ibilbide artistikoa bideo sorkuntzan, instalazioetan eta 2D eta 3D ingurune birtualetan kokatu da. Azken urteetan, buru belarri sartuta dago erregistro bideen eta espazio publikoan burutzen diren praktika eta interbentzio desberdinen ikerketan. Arantza Lauzirika dekanoarekin batera, honako hauek osatzen dute Arte Ederren Fakultateko dekanotza talde berria: Mikel Bilbao, Ikasketen Antolamendurako dekanordea; Jesus Melendez, Plangintzako eta Ekonomi Gaietarako dekanordea; Natxo Rodríguez, Unibertsitate Hedapeneko dekanordea; Susana Jodra, Nazioarteko Harremanetarako dekanordea; Begoña Medel, Kalitate dekanordea; eta Kontxa Elorza, Idazkari Akademikoa. Marrazkian, ezkerretik eskumara: Begoña Medel, Susana Jodra, Kontxa Elorza, Natxo Rodriguez, Arantza Lauzirika, Mikel Bilbao eta Jesús Melendez (Marrazkiaren egilea: José Antonio Azpilikueta, Irudigintza Saileko irakaslea) / © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun