Momentuz, belarra irten da paduraren zabaleraren %80an. "Zonalde batzuk moztu barik utziko dira, eta horrela, landa garatu egingo da ziklo oso bat osatuz eta loreek euren haziak zonalde osoan zehar sakabanatuko dituzte, espezieen mugikortasuna bultzatuz", azaldu dute Udaletik. Apurka-apurka zuhaixkak loratzen hasi dira eta gero eta ohikoagoa da ahateak eta bestelako animaliak putzuetatik gertu ikustea.
Helburuak
Herri-lanak urrian hasi ziren, eta bere helburua honakoa izan da: batetik, Urkoko berezko ekosistemak birsortzea, paduraren eta bere inguruan biodibertsitatea handituz. Eta Larrabasterran eremu berde berri bat sortzea, auzokideek berau gozatzeko aukera izan dezaten. "Laburbilduz, inguru horretako landaredia berreskuratzen hasi da, habitat berriak ezartzea bultzatuz eta ingurumen-berreskuratzea erabilera publikoarekin uztartuz. Proiektua berritzailea da (ekologia aplikatuaren adibidea), naturak berez emango lituzkeen urratsak antzeratu direlako", azaldu dute agintari sopeloztarrek.
Bizibarritutako eremua horrela geratu da: Gobela eta Lemotza ibaien artean bertako espezieen baso bat sortu da (oraindino zuhaixkak dira), ibai bien artean babestutako putzu bi sortu dira eta hori guztia lotuz ibilbide basati bat sortu da auzokideek bertatik pasatzeko aukera izan dezaten. Herri-lanak, beraz, Urko paduraren iparraldean egin dira. Eremu honek uholdeak jasotzeko arriskua du, eta hori dela eta, kirol-azpiegitura gehiago eraikitzeko asmoak bertan behera utzi dira.
Urkoko biodibertsitatea handitzeko asmoz, honako ekintzak burutu dira:
- Bertako espezieen baso bat birsortzea: Gobela eta Lemotza ibaien alboan bertako espezieen zuhaitzak landatu dira. Barruko aldean haritzak landatu dira.
- Putzu bi sortu: erdiko gunean putzu bi sortu dira, eta gune hezeak izango dira, biodibertsitatea handituz.
- Landare inbaditzaileak agertzea ekidituko da. Birsortzea da modurik onena horrelako espezieak agertzea eragozteko.
Ekimen horiek eremu horretako habitatak hobetzea ekarriko dute, eta honek lagunduko du mehatxupean dauden espezieak eremu horretan agertzea (anfibioak, hegaztiak, eta abar).
Bihartik (apirilak 1) aurrera, Larrabasterrak berdegune berri bat izango du Urkon. Gaur padura inguratu eta babesteko hesiak kantzen hasi dira, eta beraz, auzokideek berreskuratua izan den zonalde horretaz gozatzeko aukera izango dute. Sopelako Udalak bultzatutako lanen helburua egoera kaskarrean zegoen eremu hori berreskuratzea izan da, naturak berez ematen dituen urratsak jarraituz (ekologia aplikatutako kasu bat). Herri-lanak urrian hasi ziren eta, gainera, auzokideek proiektuan parte hartzeko aukera izan dute, tokiko erakundeak auzolana burutu baitzuen abenduaren 28an. Udal arduradunek zehaztu dutenez, paduraren biziberritzea bere osotasunean ikusteko, oraindik orain beharrezkoa izango da urteak pasatzea; landare, zuhaixka eta zuhaitzak guztiz hazi arte, basoak sortu arte, animaliak gunean guztiz egonkortu arte, eta abar. Proiektua Sopelako Udalak bultzatu du eta La Suma Paisajistas taldeak egin. Bere kostua 191.021 euro (BEZa abrik), eta Eusko Jaurlaritzak zein Bizkaiko Foru Aldundiak %80 ordainduko dute, Udalak dirulaguntza eskatu zuelako. Argazkian, Urko padura gaur egun / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun