Udaberriko txapelketan Estatu espainoleko hogeita hamarretik gora klubetako 164 ontzi batu dira joandako asteburuan, hainbat mailatan. Jarleku mugikorreko lehiaketa garrantzitsua da, izan ere, Espainiako Arraun Federakuntzako teknikariek Estatuko taldea osatuko duten arraunlariak ebaluatu eta hautatzeko baliatzen baitute.
Testuinguru horretan, Raspas arrauneko kirolariak urrats bat gehiago egin du Espainiako eta munduko txapelketak prestatzeko bidean. Txapelketa horiek, hurrenez hurren, ekainean Banyolasen bertan eta abuztuan Herbeheretako Amsterdam-en egingo dira. Bietan Espainiako selekzioko kide izatea espero du Diazek: "maila eta eskarmentua ari naiz hartzen urtetik urtera, selekzioan sartu ahal izateko. Nire maila hobetzen badut eta Estatuko txapelketan hari eusten badiot, aukera handiak izango ditut munduko txapelketarako deitua izateko, baita Rioko joko olinpikoetarako ere”. Hain zuzen ere, Julen Erauzkin Espainiako Selekzioko zuzendari teknikoa eta Fadurako Teknika Hobekuntzarako Zentroko kirol teknikariak hartuko du aipatu erabakia.
Virginia Diaz Rivas Areetako Raspas arraun elkarteko kirolariak zilarrezko domina lortu zuen atzo Banyoles-en (Girona) jokatutako Udaberriko Txapelketa Irekian. Diaz skiff modalitateko senior absolutuen mailan eta 2.000 metroko distantzia olinpikoan aritu zen. Raspaseko arraunlariak 8 minutu eta 30 segundoko marka egin zuen, urrezko domina lortu zuen Nuria Dominguez Asensio andaluziarrak (8:20) hamar segundo atera ziola. Tarte bera izan zen Diaz eta brontzezko domina eskuratu zuen Veronica Garcia Mulet-en (8:40) artekoa. Gauzak horrela, elkarte areetarraren ordezkariak iaz proba berean egin zuen hirugarren postua hobetu du: “pozik nago, aurten irabazi nahi nuen arren. Baina ezinezkoa izan da, ez dut nire gustuko arraunkada aurkitu, eta horrez gain, txapeldunak oso maila ona eman du eta oso arituta etorri da. Halere, pozik nago iazko hirugarren postua hobetu dut eta”, aipatu du Virginiak. Argazkian, ezkerretik eskumara Garcia, Dominguez eta Virginia Diaz / © Raspas arraun elkartea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun