Azokaren egitaraua bihar, apirilak 2, asteazkenean, hasiko da. Urtero moduan, 10:00etatik aurrera bertoko ikastetxeetako ikasleen jendaurreko irakurketa izango da. Ostiralean, hilak 4, modelatzeko ore tailerra izango da Esteban Iglesiasen eskutik, adin guztietako lagunentzat. 20:00etan "Lurraren memoria" helduentzako literatura eta musika ikuskizuna hasiko da. Horretan Toti Martínez de Lezea idazleak zenbait testu irakurriko ditu eta Maite Itoiz sopranoak hizkuntza anitzeko kantak abestuko ditu.
Larunbatean, apirilaren 5ean, eguneko egitaraua 11:00etan abiako da "Storytime" ingelesezko ipuin-kontaketa, Kids&Us Getxo-ren eskutik. Oraingo honetan "The King's Servant" familia osoarentzako kontaketa eskainiko dute.
Horren ondoren, 12:00etan, zenbait idazlek liburuak sinatuko dituzte bi orduz. Aurten honako egile hauek parte hartuko dute: Santi Agirre, Ana Iturgaiz, Nati Kaa Sánchez, Susana López, Manuel Maceda, Amaia Manzisidor, Elena Moreno eta Santi Osakar. 19:00etan "Mira Miró: Joan Miró más cerca de lo que pensamos" izeneko arte tailerra izango da Tesa Gonzálezen eskutik. Azkenik, igandean, Xabier Lizaso bertsolariak "Izeba Tekla" familiei zuzendutako musika jolas-kontzertua egingo du.
Kultur aniztasunerako jarduerak
Jarduera horiez guztiez gain, Azokan beste bi ekimen izango dira, udal Immigrazio eta Kultura artekotasunaren Unitatearen eskutik. Ostegunean, hilak 3, "Zurrumurrik ez estrategia" izeneko programa aurkeztuko da 19:00etatik aurrera eta, igandean, apirilaren 6an, "Una sola raza, la raza humana" adin guztientzako kale-antzezkizuna izango da Utopian antzerki taldearen eskutik, 12:00etan.
Bihar hasi eta igandera arte iraungo duen Getxoko Liburu Azokak, artea izango du ardatza. Bost egunez, udal liburutegiek gai horri lututako hainbat jarduera egingo dituzte Algortako Telletxe plazan. Bertan, bederatzi liburu-denda getxoztarren eta udal liburutegien etxolak kokatuko dira. Azoka goizez zein arratsaldez egongo da zabalik, igandean izan ezik, egun horretan goizean bakarrik irekiko da eta, Getxoko Kultur Etxeak zehaztu duenez. Azokan, bisitariek liburuen, komikien eta haurrentzako ipuinen azken nobedadeak erosteko aukera izango dute. Gainera, jarduera anitz izango dira: heldu eta haurrentzako ipuin kontaketak, erakusketak, ikasle getxotarren jendaurreko irakurketa eta egileen sinatze-txandak, besteak beste. Ohi denez, Kultur Etxearen liburutegiek beren gunea izango dute azokan. Horrela, irakurleei liburuak mailegatzeko aukera eskainiko zaie, eta etxera eraman ahal izango dituzte. Halaber, umeek eta gazteek komiki eta ipuinak aurkituko dituzte bertan irakurri ahal izateko. Jarduerei dagokienez, azoka osoan zehar haurrentzako eskulan tailerrak eta jolasak izango dira, eta bi erakusketa. Batean, Getxoko arte erreprodukzioak bilduko dira eta, bestean, Punta Begoñako galerietako argazki zaharrak. Argazkian, liburu azoka aurreko edizioetako batean / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun