Azken zazpi urteotan Leioak bizi izandako bilakaeraren inguruan, Leioako populazioaren %59ak herria hobetu egin dela uste du eta %5ak txarrera egin duela uste du, bestetik %36ak ez du aldaketarik somatzen. Beraz, agintari leioaztarren hitzetan, "Leioa inguruko udalerriak baino hobeto posizionatuta dagoela hautematen da". %85ak uste du Leioa inguruko udalerrien parean edo egoera hobean dagoela. Bestalde, udalerri osoan zehar iritziak "nahiko homogeneoak" izan omen dira, eta hori "datu esanguratsutzat" jo dute tokiko arduradunek: "zonaldearen arabera iritziak aldaketa handirik izan barik, hau da, erdialdean eta auzoetan iritziak antzekoak dira. Zentsu honetan bilakaera positiboaren hautemate oreka nagusi da", esan dute.
Udal kudeaketa
Udal kudeaketari buruz, Leioako populazioaren %50ak positibotzat jotzen du. Beti ere, datuak eskuak, tokiko erakundeak nabarmendutakoaren arabera. Bataz besteko notagatik galdetuta, leioaztarrek 3,4ko nota jartzen diote Udalari 5 puntuko eskala batean.
Horretaz gain, leioaztarrek "azken urteotan hobetutako gauzak" azpimarratzen dute, adibidez, parkeak eta lorategiak, herritarrenganako informazioa, gizarte zerbitzuak, hirigintza eta garbiketa lanak eta kultur zein kirol eskaintza. Bestalde, herritarrei gehien kezkatzen zaien gaien artean honakoak agertzen dira; kirol instalazioak, aparkalekuen gabezia, komunikazioak eta Leioako sarbideak. Baina orokorrena, leioaztarrek udalerri garbia, lasaia eta bizitzeko atsegina dela uste dute.
Leioaztarren gehiengoa (%95) bere herriarekin pozik agertzen da, eta azken urteetako bilkaera positiboa izan dela uste du, Udalaren aginduz Ikerfelek egindako azken ikerketaren emaitzen arabera. Azterketa egiteko, metodologia mistoa erabili da, hau da, kualitatiboa eta kuantitatiboa, lan talde birekin eta telefonoz egindako 600 elkarrizketekin 18 urte baino gehiago dituzten leioaztarrei. Tokiko iturriek nabarmendu dutenez, datuen arabera, Leioan bizi diren 5 biztanletik 4 pozik edo oso pozik agertzen dira Leioan bizitzeagatik, 4ko puntuazioa emanez Leioari 5eko eskala batean. Soilik Leioan bizi direnen %5 ez da pozik agertzen udalerrian bizitzearekin. "Etorkizunari begira, bost urte barru, eta egungo krisi ekonomikoa izanda ere, leioaztarren %60ak Leioan bizitzea atseginagoa izango dela uste du, kontrakoa uste dutenak %10 osatzen dute,gainontzekoek gauzak berdin mantenduko direla uste dute", diote Idaletik. Argazkian, Avanza errepidea Leioan / © Leioako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun