Abaroa enpresa "EAJren babesari esker" atera da errugabe eta arduragabe 66 etxe suntsitu zituen hondamen horretatik, Erandioko Bilduren ustez. Hala ere, etxez aldatutako familiak ez dira kaltetu bakarrak, koalizio subiranistaren ustez. Ezkertiarren hitzetan, "EAJk akordio bat itxi du Azpiegitura elkarte publikoarekin suntsitutako etxeak botatzeko eta berriak eraikitzeko, PSE-PSOE eta PPren babesarekin, eta Erandioko herriak garesti ordainduko du akordio hori". Izan ere, trukean, Altzagan libre geratzen den lur-eremu bakarra, Tartanga eta kiroldegiaren artean dagoen eta kirol eta berdegune izan behar zena, 300 etxe baino gehiago eraikitzeko erabili nahi omen dute.
Azkenik Bilduk gogoratu du Erandioko Udalak auzokide kaltetuak etxe berrietara joan arte izango diren gastuen ardura bere gain hartu duela, eta "aseguru etxeek indemnizazio gisa auzokideei ordaindutako 6 milloi euro gastatzen badira, gainerako gastua Udalaren aurrekontuaren gainean joango dela". "Gaur egun 6 milloi horiek arin baino arinago joaten ari dira alokairu oparoak ordaintzen. Eta Abaroak kobratzen", amaitu du Erandioko Bilduk.
2007ko urtarrilean Erandioko Altzagako Ibarra eta Antxon Fernandez kaleetako zein San Agustin plazako 45 familia beraien etxeetatik atera behar izan zituzten, alboan egiten ari ziren obra batzuek eragindako hondamendiagatik. Aipatu lanak egiten zebilen enpresa berak, Abaroak, sendi horiek tokiz aldatzeko erabilitako etxebizitza batzuetako jabea dela mahaigaineratu du Bilduren udal taldeak, baita erandioztar horiei "izugarrizko alokairua" kobratzen ari diela salatu ere. "Abaroak 680 eta 800 euro arteko alokairuak kobratzen ari da hileko berak sortutako hondamenagatik. Etxe hoiek hutsik zituen enpresak, saldu edo alokatu ezinik", adierazi du koalizio ezkertiarrak. Abaroaz gain, "Caixa edota beste jabe pribaturenak" diren etxebizitzak alokatzen ari dira, eta "horiek ere mozkin ederrak" ateratzen ari dira, gaineratu duenez. Hain zuzen ere, martxoaren 27ko udal bilkuran, alokairuen salneurria berriro negoziatzea eta Etxebidek ezarritakoekin (gehienez 450 euro hilean) parekatzea proposatu zuen Erandioko Bilduk (4 zinegotzi). Baina, mozioa errefuxatua izan zen EAJren kontrako botoekin (10) eta PSE-EEren (5) eta PPren (2) abstentzioarekin. Argazkian, Joseba Goikouria alkate, Abaroari "babesa" ematea egotzi dio EAJri Bilduk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun