"Europan, ikuskizunen testuinguruan, ezohiko idazkeraz normaltasunez hitz egin ohi da, idazkera horrek testu batean isla izan edo ez. Ikuskizun guztiek sortzailea dute atzean, autore bakarra edo taldea dela, eta dramaturgia horrek antzezteko behar duen beharrezko elementu guztiak izan behar ditu, testuan oinarritutako edozein lan bezala", azaldu zuten atzo Umore Azokaren arduradunek.
Kasu askotan idazkera hori "bapatekotasunaren gaineko ikerketa prozesuaren ondorioa" da; beste batzuetan, aldiz, ikuskizuna sortzen doan heinean osatzen da; eta badago este aukera bat ere, hau da, pentsatzea, hausnartzea eta idaztea, eta kasu honetan, kalean antzezteko idazten da.
Prozesu horretan, Umore Azokako arduradunen arabera, kontuan hartu beharreko bi ezaugarrik baldintzatzen dute egilea. Lehenik eta behin, espazioaren berezitasuna aintzat hartu behar du, bai eta plazaratuko duen testuingurua ere, hots, kalea, espazio publikoa, honek eskaintzen dituen abantaila eta traba guztiekin.
Horrez gain, ikuskizunaren lekuko izango den jendean pentsatu behar da, sarrerarik ordaindu ez duten ikusleak izan ohi baitira, adin zein maila kultural eta artistiko ezberdina duen jendartea, eta haietako askok ikuskizuna borondatez eta konzienteki hurbildu badira ere, beste batzuek berarekin topo egin dute.
Arte eszenikoen profesional, ikasle zein disziplina ezberdinetako sortzaileei zuzendutako kaleko ikuskizunak idazten ikasteko tailerra egingo dute apirilaren 29an, Leioako Umore Azokaren aurrerapen gisa. Generik Vapeur konpainia frantseseko zuzendari Pierre Berthelot izango da jardunaldiaren gidaria. Maiatzaren 15etik 18ra izango den Umore Azokaren antolatzaileek atzo azaldu zutenez, "Kalean antzezteko idaztea" izenburupean, alderdi teorikoa eta praktikoa jorratuko dituzte parte hartzaileek, ikasle eta hizlaria elkarrekin, "Euskadin eta Espainian kale arteek bizi duten unea islatu asmoz". Horrez gain, Frantzian eskuragarri dituzten baliabide eta metodoen ikuspegi praktikoa ere landuko dute. Horrela, apirilaren 29an, goizeko 9etatik arratsaldeko ordu bietara bitartean, tailerra egingo dute Kultur Leoan, SGAE Fundazioak, Institut Françaisek eta Umore Azokak antolatuta. Arte eszenikoen alorrean diharduten elkarteen laguntza ere badaukate, hala nola, Besteak, Eskena eta Artekale. "Kalean antzezteko idaztea" tailerrean parte hartzeko izena ematean 10 euro ordaindu behar dira eta www.umoreazoka.org webgunean gauzatu daiteke. Argazkian, Umore Azokako ikuskizunetariko bat / © Umore Azoka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun