Jai Batzordeak umeen proposamenak jasoko ditu, umeek erabaki dezaten zer nolako jaiak nahi dituzten. Izan ere, Jai Batzorde barruan haur eta familien lan taldea sortu zen orain urte bi, eta bertan ez dago haurrik, danak dira guraso edo hezitzaileak. Lantalde honen arabera, ez du zentzurik helduok diseinatzea eta antolatzea haurren programazio osoa.
Horrenbestez, igandean, Jai Batzordeak umeei galdetuko die euren ametsetako jaiak nolakoak izango liratekeen, eta horretarako, euren jairik gustukoenak marraztuko dituzte. Marrazki guztiak amaituta daudenean, erakusketa txiki bat antolatuko dute, eta haur bakoitzak hiru gometxa izango ditu gustokoen dituen ideiak bozkatzeko. Erakusketa apirilaren 20ra arte egongo da erakusgai Kurtzion, eta ume guztiek parte hartzeko aukera izango dute.
Ametsetatik ekintzetara
Bigarren dinamika “Ametsetako jaiak gauzatuz” izenekoa izango da, maiatzaren 4an, igandea, 17:30ean Kurtzio Kultur Etxean, eta umeekin asanblada bat egingo dute. Bertan, ideiarik bozkatuenak zeintzuk izan ziren azalduko diete, eta beraiekin batera ideia horiek errealitatera nola eraman asmatzen ahaleginduko dira. Saioa amaitzeko, jolasak eta askari txiki bat antolatu dute.
Sopelako Jai Batzordeak eskuorri bat banatu du Zipiriñe eta Ander Deunan, familiak ekimen honetan parte hartzera gonbidatuz. Informazio gehiago jasotzeko, ekarpenak egiteko edo jai batzordean parte-hartzeko: sopelakojaibatzordea[abildua]hotmail.com.
Ekimen honek umeen aisialdi-partehartzailea sustatzeko helburua du, orain hainbat herri, eskola eta aisialdi egitasmotan martxan jartzen ari diren “herri hezitzaile”aren aterkipean.
Sopelako Jai Batzordeak hilabete bi baino gehiago daramatza aurtengo San Pedro eta Karmen jaiak antolatzen. Apurka-apurka egitaraua osatzen ari dira, eta festekin lotutako hainbat ekimen abiatu dituzte jada: kartel lehiaketa (lanak aurkezteko epea maiatzaren 12an amaituko da), bertako musika taldeek euren maketak aurkezteko epea zabalik dute (apirilaren 20ra arte), eta abar. Azken urte bietan legez, Jai Batzorde koloretsua osatu dute aurten ere: herriko elkarteak, koadrilak, Udalaren ordezkariak eta adin ezberdinetako auzokideak. "Antolakuntza herrikoi honek, bere ondorioa izan du jaietan, inoiz baino partehartzaile eta herrikoiagoak izan direlako", nabarmendu dute tokiko agintariek. Baina aurten, adin guzti-guztietako sopeloztarrek parte hartuko dute jaien antolakuntzan. Orain arte, gazte, heldu eta nagusiak egon dira buru-belarri jaien antolakuntzan, nagusi zein umeentzat egitaraua prestatzen. Baina aurten, umeek zuzenean erabakiko dute, inolako bitartekaritza barik, zer nolako jaiak nahi dituzten. Horretarako, bilera oso bereziak antolatu dituzte Haur Hezkuntza eta Lehen Hezkuntzako umeentzat (3-10 urte arteko haurrak, gutxi gora-behera). Lehenengo dinamika “Ametsetako jaiak marraztuz” lelopekoa izango da, igande honetan, apirilak 6, 17:00etan Kurtzio Kultur Etxean. Argazkian, umeentzako ikuskizuna San Predo jaietan / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun