EH Bilduren Getxoko zinegotziek gaur gogoratu dutenez, aurten bost urte beteko dira EAJk eta PSE-EEk udalerrirako Etxebizitza Plana adostu zutenetik, herri-lurzoruan etxeak altxatzeko asmoz. Bere printzipioen artean, besteak beste, etxebizitza sozialaren eskaera betetzea, babestutako alokairuzko etxebizitza parke publikoa osatzea eta udalerriko etxebizitza librearen merkatuan eragitea daude. Bada, printzipio horiekin tokiko erakundean ordezkaritza daukaten talde guztiek bat egiten dutelakoan eta aipatutako Etxebizitza Plana "espero zitekeen arrakastarik izaten ari ez delakoan", Getxoko EH Bilduk EAJren Udal Gobernuari eta gainontzeko alderdiei dei egin die lehenbailehen Etxebizitza Mahaia osa dezaten, non denen artean Getxoko etxebizitzaren arazoa aztertuko duten eta irtenbide praktikoak bilatuko dituzten. Hautetsi independentistek eskura eman diete gutuna gainontzeko alderdietako ordezkariei. Argazkian, Bingen Saitua, Maitane Nerekan eta Arantza Gutierrez zinegotziak Alangon emandako prentsaurrekoan. Bertan eraikitako 33 BOEak (eskuinean) "banatu gabe" daude oraindik.
"Etxebizitza Mahaia osatzen bada gune iraunkorra izan beharko da, Getxoko eta bertan Getxoko etxebizitzaren arazoa bere osotasunean aztertu beharko da, besteak beste, honako gaiak aztertuz: etxebizitza hutsari aurre egiteko eman beharreko pausuak, Bizigune programa sustatzeko neurriak, hiri-lurzoruan dauden Exekuzio Unitateetan alokairuak izateko finantziazio iturriak eta abar", azaldu du EH Bilduk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun