Algortako Ernairen hitzetan, Getxon geratzen diren lur libreak porlanaz betetzea "ez da irtenbidea" gazteen etxebizitzen arazoa konpontzeko. "Getxoko eta batez ere, Andra Mari eta Azkorriko lurrak porlanez eta hormigoiez bete nahi dituzte, etxebizitza beharrezkoa denaren aitzakia hartuta", kritikatu du gazte erakundeak. Etxebizitza hutsen erabilpena sustatzeko edo alokatzeko laguntzak luzatu beharrean, "beharrezkoak ez diren etxebizitzak eraikitzea" egotzi diere agintariei, "gazteok ordaindu ezin badugu ere". "Hormigoiez betetako herri gris eta artifiziala sortu nahi dute", beraien ustez.
Tosuri dagokionez, arrisku larrian da landa okupatua, oraindik zabaldu ez duten Ibarbengoako metro geltokitik gertu. Izan ere, parking-a egin nahi dute bertan.
Ortua Algortako Telletxe plazara eraman zuen atzo Ernaik (© Algortako Ernai)
Orain urte batzuk Lurralde Zati Planak (LZP) Getxorako aurreikusten zituen zortzi mila etxebizitza altxatzeko "asmo berberak" sumatu ditu Algortako Ernaik, Herri Antolakuntzako Plan Orokorraren (HAPO) berrikuspenean. Egungo "asmo desarrollistak eta espekulatzaileak", baina, testuinguru desberdin batean kokatu ditu gazte antolakundeak: "ekonomikoki eta sozialki krisi estruktural batean murgilduta gauden honetan, Udalak aurrera eraman nahi duen hirigintza politikak ez du lekurik. Getxoko auzoetako nekazal eremuekin bukatzen ari den politika espekulatzaile hutsa. Porlana ez da jaten!", salatu dute neska-mutilek. Algortako Ernairen ustez, tokiko erakundeak "aurrera daraman hirigintza politika basatiak laborantza lurrik gabe uzten du gure herria". Horren aurrean alternatibak badaudela iritzita, asteazken honetarako (apirilak 9), Tosuko landa okupatuaren inguruko hitzaldia egingo dute. Hitzordua 19:00etan jarri dute, Abian kultur elkartean (Bidebarri 2), Algortan. Argazkian, ortua Algortako Telletxe plazara eraman zuten atzo gazteek / © Algortako Ernai.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun