Pasaiako segadaren 30. urteurrena dela-eta Sopelan margotutako muralaren bideoa (cc-by el truco es la magia)
Martxoaren 22an bete ziren 30 urte Espainiako poliziak Pasaiako portuan Dionisio Aizpuru "Kurro" eta Pedro Mari Isart "Pelitxo" azpeitiarrak eta Rafael Dela "Txapas" eta Jose Mari Izura "Pelu" txantrearrak hil zituela. Komando Autonomo Antikapitalistetako kideak ziren, eta beste kide batekin batera txalupa batean zihoazen. Lauren gorputzek 113 bala jaso zituzten guztira. Bosgarren kidea, Joseba Merino donostiarra, atxilotu egin zuten, eta 17 urte egin zituen espetxean. Haien senitarteko eta lagunek Pasaiako segada hura argitzeko eskatzen jarraitzen dute, 30 urte ondoren argi-ilun asko baititu oraindik kasuak. "Bertsio ofizialaren arabera enfrentamendu bat izan zen, baina guk badakigu, lekukoen hitzak entzunda, zer gertatu zen", diote gertukoek. Ziur daude "aurrez pentsatu, prestatu eta erabakitako sarraskia" izan zela. Gaur egun oraindik ez du inork hilketa haien gaineko erantzukizunik bere gain hartu. Bada, hori gogoratzeko horma-irudia egin dute ezezagunek Sopelan; baita Youtube sare sozialean horren gaineko bideoa zabaldu ere. Argazkian, murala, bideotik ateratako irudian / cc-by el truco es la magia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun