Europako Legebiltzarrerako hauteskundeak igaro ez eta 2015eko maiatzean izango diren udal bozei begira dago jada Euzko Alderdi Jeltzalea (EAJ). Jelkideek Getxo udalerrian dituzten hiru uri buru batzarretako (Algorta, Getxo eta Ondarreta) asanbladek "aho batez" izendatu zuten joan den ostegunean Imanol Landa Jauregi egungo alkatea, beste lau urtez tokiko agintaria izateko hautagai. Mahai gainean ez zegoen beste izenik. Horrela jakinarazi zuen hurrengo egunean "Deia" egunkariak eta Landak berak bere blogean baieztatu. Zortzi urtez abokatu lanetan ibilitakoa, 1999tik 2003ra bitartean, letradu eta zinegotzi lanak tartekatu zituen. Getxoko Udal Egoitzaren lehendakaria zen orduan. 2003ko legealdiaren hasieratik, aldiz, abokatu lana baztertu zuen, Lehendakaritza arloko zinegotzi arduraduna izateko. Aukeratua izanez gero, alkatetzan hirugarren agintaldia egingo luke Landak, 2007tik baita Getxoko alkatea. Argazkian, 2011ko ekainaren 11n Getxo udalerriko Udalbatza berria eratu eta Imanol Landa Jauregi jelkidea alkate izendatu zuten bigarrenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun