Badira lau urte Berango eta Getxo artean, Andra Mari izeneko Getxoko landa auzoan, Metro Bilbaok Ibarbengoa geltokia amaitu zuenetik. "Auzokideek zein metroaren erabiltzaileek obren kalteak pairatu izan behar badituzte ere, geltokiak itxita jarraitzen du eta ez du inolako zerbitzurik ematen", EH Bilduk deitoratu duenez. 2013ko abuztuan, "bat-batean", Ibarbengoa geltokiaren goiko aldean, Tosu estratan egin nahi duen aparkaleku proiektua aurkeztu zuen Eusko Trenbide Sareak. Erakunde horren iritziz, parkinga egitea "beharrezkoa" da geltokia zabaldu ahal izateko. "Hala ere, aparkalekuaren proiektuaren barruan, ez dute horren beharra justifikatzen duen inolako txostenik edo informazio eguneraturik frogatu. Hori exijitzean Jaurlaritzaren Garraio Sailak, Bilboko Hiri Trenbidearen Sareari buruzko Azterlana, Metro Bilbaoren Garraiorako Sistema Osagarrien Azterlana, eta, Maidagango Trenbide-pasagunea Lurperatzeko Trazadura Egiteko Proiektua nahikotzat eman ditu aparkalekuaren beharra frogatutzat emateko, nahiz eta azterketa horiek orain 10 urte ingurukoak diren eta Jaurlaritzak berak onartu duen ez dutela gaurkotasunik. Disuasio aparkaleku bezala aurkezten dute Ibarbengoakoa. Baina ba al dakite zenbat erabiltzaile izango dituen? Zergatik disuasio parkinga Getxoko landa gune garrantzitsuenean? Ez al da beste gune urbanorik hori egiteko? Zergatik geltokia amaitu eta lau urtera? Bizi dugun krisi garaian, non diru publikoaz egindako inbertsioak ondo neurtu behar diren, lehentasuna al da hori Uribe Kostako garraio sarean? Zergatik egingo da Tosun hasierako proiektuan geltokiaren beheko aldean aurreikusten bazen?", adierazi dute Nerekanek eta Saituak.
Bestalde, Getxoko zenbait auzokidek zein eragile ekologistek salatu dute geltokia egitean eremu horretan dauden akuiferoak ikutu eta ur ibilbideak aldatu daitezkeela; aparkalekuarekin bertako ekosisteman kalteak egon daitezkeela salatu dute ere (kontuan izan behar da Andra Mari Getxoko birika berdea dela gaur egun). Hala ere, proiektuan ez dago ingurugiro eragina aztertzen duen txostenik, Getxoko EH Bildukoek kritikatu dutenez.
Horrez gain, inguruko auzokideek zein EH Bilduk, behin eta berriz salatu dute Ibarbengoako aparkalekuaren inguruan dagoen "desinformazio estrategia" zein "kudeaketa iluna". "Adibideak ugariak dira: desjabetuak izango diren auzokideen informazio falta, proiektuari alegazioak egin eta erantzunik ez jasotzea, Getxoko Planeamenduan jasota ez dagoen proiektua izatea… Zergatik gestio iluna eta desinformazioa?", salatu dute hautetsi soberanistek.
Espekulazioa eta aberastea
EH Bilduk "argi" du Ibarbengoako aparkalekuaren proiektua EAJk Getxoko Andra Mari inguruan duen "espekulazio eta aberaste estrategiaren" lehen pausoa besterik ez dela. "Herriko landa gune eta birika garrantzitsuenetako bat denean 8.000 etxebizitza egiteko proiektua egin zuen EAJk. Herritarren mobilizazioak eta krisi sozio-ekonomikoak, Andra Mari porlanez konkistatzea helburu zuen etxebizitzen proiektua gelditu zuten. Baina gelditu egin da EAJk lur horiekin enpresa eraikitzaile handiak aberasteko duen nahia?", diote Nerekanek eta Saituak.
Getxo Hiri Antolaketa Plan Orokorraren (HAPO) eztabaidan murgilduta dago. Hala ere, horretan parte hartzen ari direnei "ez zaie ezer galdetu" Ibarbengoa geltokiaren goiko aldean, Tosu estratan, egin nahi duen aparkaleku Ibarbengoako aparkalekuari buruz. EH Bilduren zinegotzi getxoztarrek gaur mahaigaineratu dutenez, egun indarrean dagoen 2001eko planean ez dago jasota Ibarbengoako parkinga eta "jasota egon beharko litzateke". Maitane Nerekanek eta Bingen Saituak salatu dutenez, "Getxoko Gobernua osatzen duen EAJk behin eta berriz aparkaleku proiektuaren inguruko azalpenak eman behar izatea errefusatu du Trenbide Plan Sektorialaren barruan 'goitik inposatuta' dagoen proiektua dela argudiatuz. Gezur galanta! Aparkalekua ETSk egin nahi duen kokapenean, Getxoko Osoko Bilkuratik pasa beharko litzateke, HAPOn aldaketa bezala jasotzeko". EH Bilduk hori exijituko du datorren udal komisioetan. Halaber, Eusko Jaurlaritzaren Garraio Sailari exijitzen dio bitartean proiektua geldi dezala eta Ibarbengoa geltokia berehala zabaldu dezala bertako auzokideek erabili ahal dezaten. Azken horretarako, Eusko Legebiltzarrean eman dute prentsaurrekoa gaurkoan Nerekanek eta Saituak, Marian Beitialarrangoitia Bilduren parlamentariarekin batera. Argazkian, Beitialarrangoitia Nerekan eta Saitua artean gaur, Gasteizen / cc-by Getxoko EH Bildu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun