Euskal Selekzioaren Aldeko Iritzi Taldea (ESAIT), Euskal Herrian Euskaraz (EHE), Bilgune Feminista, Bai Euskal Herriari, Askapena, Ernai, Ikasle Abertzaleak (IA) eta Elkartzen herri mugimenduko eragileek ere apirilaren 2an babesa adierazi zioten, Independentista Sareak deituta, "Euskal Herriko hiriburuan, Iruñean izango dugun nazio ospakizunari".
Apirilaren 17tik 20ra egingo dituzte Ernaik eta Aitzinak Gazte Burutakzio Topaketak, Altsasun. Galdera bat dute buruan, ekinez erantzuteko: "Nola egin aurre sistemari?". Horien amaiera Iruñean izango da, igandean.
Aurten ere EAJ bakarrik
Euzko Alderdi Jeltzaleak (EAJ) bere aldetik, "mundu osoko euskotarrak" gonbidatu ditu apirilaren 20an Bilboko Plaza Barrian egingo den Aberri Eguneko ospakizunean parte hartzera. “Euskadi Europara Begira” da aurtengo leloa.
Erabakitzeko eskubidea eta lurraldetasuna jarri dituzte aurtengo Aberri Egunerako ardatz gisa Sortuk, EAk, Aralarrek, ABk eta Alternatibak, Euskal Herriko nahiz nazioarteko “testuinguru esanguratsua” gogora ekarrita. Irungo Ficoban aurkeztu zuten orain astebete beren gogoeta, ekitaldietarako deia eginez: apirilaren 19an Larresoron (Lapurdi), 17:00etan, Herriko Salan; eta apirilaren 20an, Iruñean (Nafarroa Garaia). Gatazkaren ondorioak konpontzeko hasitako bidea aintzat hartuta, “benetako zoru demokratikoa” aldarrikatu dute, prozesua bermatzeko. Hain zuzen ere, Independentistak sareak Iruñera deitu du igandeko Aberri Egunerako. 12:00etan abiatuko da manifestazioa Golem zinematik, eta 15:00etan bazkaria izango da Anaitasunan. Egun osoan zehar INDEfesta izango da Alde Zaharrean. Bada, Uribe Kostatik ere aterako dira bertara joateko autobusak. Asteazkenera arte izena eman daiteke ohiko lekuetan. Plentzian (09:00), Sopelan (09:15), Algortan (09:25), Itzubaltzeta / Romon (09:35), Leioan (09:45) eta Erandion (10:00) batuko dute jendea. Argazkian, 2012ko Aberri Eguna Iruñean / © Independentistak Sarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun